Zamzam Mohamed
Muqdisho, Soomaaliya – Hoggaamiyaha xisbiga mucaaradka ee Wadajir, Abdirahman Abdishakur Warsame, ayaa si adag u dhaliilay dowladda federaalka Soomaaliya iyo maamulka Puntland, isagoo ku eedeeyay inay siyaasad ahaan iyo amni ahaanba kala qaybsan yihiin, taasoo dhibaato ku ah halganka loogu jiro xasilinta dalka iyo la dagaallanka argagixisada.
Abdirahman Abdishakur ayaa carrabka ku adkeeyay in kala duwanaanshaha muuqda ee qoraallada ka soo baxay Villa Somalia iyo Puntland ay caddeyn u yihiin sida ay labada dhinac ugu kala fog yihiin arrimaha amniga iyo siyaasadda. Wuxuu tilmaamay in Madaxweynaha Soomaaliya uusan wax xus ah u samaynin Puntland ama dagaalka ka socda gobolkaas, tan iyo markii dagaalku bilowday. Sida uu sheegay, tani waxay muujinaysaa dayacaad ka jirta dowladda ee ku aaddan iskaashiga amni ee muhiimka ah.
“Waxaa muuqata in dowladda federaalka iyo Puntland ay ku mashquulsan yihiin uun ammaanta Maraykanka iyo madaxweynihiisii hore Donald Trump, iyagoo iska indha-tiraya xaaladda dhabta ah ee amni ee dalka ka jirta,” ayuu yiri Abdirahman Abdishakur.
Wuxuu intaas ku daray in tani ay daliil u tahay sida dowladda federaalka loogu kalsooni qabin inay si dhab ah u maareyso amniga qaranka, isagoo carabka ku adkeeyay in la dagaallanka argagixisadu uu u baahan yahay iskaashi dhab ah oo dhexmara dhammaan qeybaha kala duwan ee dowladda.
Eedaha Siyaasadeed ee Abdirahman Abdishakur
Abdirahman Abdishakur ayaa sidoo kale si adag u dhaliilay hab-dhaqanka siyaasadeed ee dowladda, isagoo xusay dhowr arrimood oo keeni kara burburka dowladnimada Soomaaliya, kuwaas oo kala ah:
- Ku tumashada dastuurka iyo sharciga
- Sadbursi, qoys iyo qaraabo kiil
- Eex, musuqmaasuq, iyo ajnabi u adeeg
“Argagixisada waxaa looga adkaan karaa oo kaliya marka dowladda iyo shacabka Soomaaliyeed ay si wadajir ah uga shaqeeyaan xasilinta iyo dib u dhiska dalka,” ayuu yiri Abdirahman Abdishakur.
Wuxuu ku baaqay in la helo iskaashi buuxa oo dhexmara dowladda dhexe iyo maamul goboleedyada, si loo mideeyo dadaallada lagu xaqiijinayo amni iyo xasillooni waarta oo dalka ka hirgasha.
Hadalka Abdirahman Abdishakur wuxuu iftiiminayaa kala qaybsanaanta Villa Somalia iyo Puntland, taasoo caqabad ku ah halganka lagu ciribtirayo argagixisada. Dhaliisha uu u jeediyay dowladda federaalka waxay ku saabsan tahay inaysan la imaan hogganaan mideysan, taasoo caqabad ku noqon karta amniga iyo dowladnimada Soomaaliya.
Waxaa la is-weydiinayaa: Xagee Soomaaliya u socotaa haddii madaxda sare aysan ku mideysnayn dagaalka argagixisada?
