Faafan, DDS – Maamul-goboleedka Dawlada Deegaanka Soomaalida (DDS) ayaa si rasmi ah u xusay maalinta tacadiyada lagula kacay shacabka deegaanka, iyadoo madal si heer sare ah loo soo agaasimay lagu qabtay magaalada Jigjiga ee gobolka Faafan.
Madasha ayaa waxaa ka soo qeyb galay masuuliyiin sare oo heer degaan ah, kuwaas oo uu ugu horreeyo Wasiirka Xafiiska Madaxweynaha DDS, Dr. Xuseen Xashi Qaasim. Waxaa sidoo kale ka qeyb galay xubno ka tirsan Komishinka Baadhista Tacadiyada, maamulka gobolka Faafan, culimaa’udiin, odayaasha dhaqanka, iyo marti sharaf kale oo muhiim ah.
Madasha ayaa lagu falanqeeyay muhiimadda maalintan ay leedahay, xaqiiqooyinka dhabta ah ee la xiriira tacadiyadii loo geystay shacabka deegaanka, saamaynta ay ku reebeen bulshada, iyo qorsheyaasha lagaga hortagi karo in falal noocaas ah ay markale ka dhacaan.
Wasiirka Xafiiska Madaxweynaha DDS, Dr. Xuseen Xashi Qaasim, oo khudbad ka jeediyay madasha, ayaa si adag u muujiyay in aan la gudbi karin marxaladihii murugada lahaa ee shacabka deegaanka soo mareen ilaa si dhab ah loo aqoonsado tacadiyadii dhacay iyo cida geysatay.
“Dhibaatadii dadkeenna soo gaartay waxay ahayd mid aad u culus. Waxaa la sameeyay waxyaabo aan la fileyn in bani’aadam lagu sameeyo. Waxaa si toos ah loo bartilmaameedsaday dadka ugu danyarsan bulshada,” ayuu yiri Dr. Xuseen.
Mas’uuliyiinta kale ee ka hadlay madasha ayaa carabka ku adkeeyay baahida loo qabo cadaalad dhab ah, in la helo dib-u-heshiisiin sal adag leh, iyo dhismaha hay’ado awood u leh inay ka hortagaan tacadiyada mustaqbalka.
Gunaanadkii madasha ayaa lagu muujiyay muhiimadda ay leedahay in bulshada deegaanka la siiyo nabad, cadaalad, iyo xaqa ay u leeyihiin nolol xor ah oo ka maran cabsi iyo tacaddiyo.
 ayaa magaalada Jigjiga ku qabatay madal lagu xusayay maalinta tacadiyada lagula kacay shacabka deegaanka. Mas’uuliyiinta, culimada iyo odayaasha dhaqanka ayaa ka hadlay muhiimadda xusuusta dhacdooyinkii hore iyo baahida cadaalad, dib-u-heshiisiin iyo nabad waarta.){kind=link}