Dhahar (Dawan) – Wasaaradda Arrimaha Gudaha, Federaalka & Dib-u-hishiisiinta Soomaaliya ayaa Talaadadii si adag u cambaareysay dagaalkii ka dhacay degmada Dhahar ee gobolka Sanaag. Wasaaraddu waxay soo saartay baaq xooggan oo ku saabsan in Madaxweynaha Puntland uu joojiyo howlgalada millatari ee xaaladda ka sii daraya. Wasaaraddu waxay tacsi u dirtay ehelada dadka ku geeriyooday dhacdada, waxaana ay caafimaad degdeg ah u rajeysay dadka ku dhaawacmay.
War-saxaafadeedka ayaa cambaareeyay dagaallada socda, waxaana ay dhammaan dhinacyada ku lugta leh ku boorisay inay joojiyan dagaallada isla markaana bulshada deegaanka ay ku dadaalaan nabad iyo xasilooni. “Waxaan ku boorineynaa dhammaan dhinacyada ku lugta leh rabshadaha inay si degdeg ah u joojiyaan, waxaana sidoo kale ku baaqeynaa in bulshada deegaanka ay xasilooni iyo nabad qaataan,” ayaa lagu yiri war-saxaafadeedka.
Qayb ka mid ah war-saxaafadeedka ayaa si gaar ah ugu baaqday Puntland inay dib u eegto istiraatiijiyadda millatari, iyadoo si gaar ah loogu yeeray in ciidamada laga soo diray Qardho ay dib ugu noqdaan. “Waxaan ka codsaneynaa Madaxweynaha Puntland inuu joojiyo falalka sii hurinaya colaadda, isla markaana uu dib ugu soo celiyo ciidamada laga soo diray Qardho, kuwaas oo markii hore loo diray inay la dagaallamaan kooxaha argagixisada, balse nasiib darro loo isticmaalay ujeedooyin kale,” ayaa lagu yiri.
War-saxaafadeedka ayaa ku soo gabagaboobay baaq xooggan oo ku saabsan in dib loo soo celiyo nabadda degmada Dhahar, iyadoo lagu adkeeyay in si degdeg ah looga hortago sababaha asaasiga ah ee rabshaduhu ka dhasheen, ka hor inta aanay dhibaatada sii kordhin.
Dagaalka ka dhacay Dhahar ee u dhexeeyay ciidamo u dhashay qabaa’ilka deegaanka, oo kala taabacsan SSC-Khaatumo iyo Puntland, ayaa Dowlad-goboleedka Puntland horay ugu eedeysay xukuumadda Madaxweyne Xasan Sheekh Maxamuud inay soo abaabushay oo dirsatay maleeshiyaad hubeysan si ay colaad uga huriso degmada.
Dagaalkani wuxuu muujinayaa khilaafyada aan la xallin ee ka dhex jira hannaanka federaalka ee Soomaaliya. Puntland waxay ku adkaysanaysaa in ay xukunto Sanaag, halka SSC-Khaatumo ay ku andacoonayso sharciyad iyada oo loo marayo aqoonsiga federaalka.
