Wasiirka Arrimaha Dibadda ee Itoobiya, Dr. Gedion Timothewos, ayaa booqasho rasmi ah ku tegay magaalada Jabuuti, isagoo ay wehelinayeen wafdi heer sare ah oo ka socda Itoobiya. Wafdigan ayaa si diirran loogu soo dhaweeyay Garoonka Caalamiga ah ee Jabuuti, halkaas oo Wasiirka Arrimaha Dibadda iyo Iskaashiga Caalamiga ah ee Jabuuti, Mahamoud Ali Youssouf, uu ku soo dhaweeyay dhiggiisa.
Booqashadan ayaa diiradda lagu saaray xoojinta xiriirka labada dhinac, iyadoo maanta la filayo in la qabto wada-hadallo sare oo looga arrinsanayo iskaashiga dhaqaale, ganacsiga, iyo nabadgelyada gobolka Geeska Afrika.
Horumarinta Iskaashiga Laba Geesoodka ah
Labada wasiir ayaa bartiisa X ku xaqiijiyay muhiimada booqashadan. Wasiirka Arrimaha Dibadda ee Itoobiya, Dr. Gedion, ayaa ku sheegay inay kulamo muhiim ah la yeelan doonaan madaxda Jabuuti, halka Wasiir Mahamoud uu ku tilmaamay fursad dib loogu qiimeynayo xiriirka walaaltinimo ee labada dal.
Itoobiya iyo Jabuuti waxay leeyihiin xiriir istiraatiiji ah oo ku qotoma dhinacyada dhaqaalaha iyo siyaasadda. Ku dhawaad 90% badeecooyinka Itoobiya waxay ka soo galaan dekedaha Jabuuti, halka Itoobiya ay tahay taageere muhiim ah oo kobcinta dhaqaalaha Jabuuti.
Mashruucyada Dhaqaalaha iyo Ammaanka
Is-dhexgalka dhaqaale ee labada dal waxaa xoojinaya mashaariic waaweyn sida tareenka Addis Ababa-Jabuuti oo fududeeyay isu socodka ganacsiga. Sidoo kale, labada dal waxay dhowaan ku heshiiyeen in ay dhisaan guddi wadajir ah oo lagula dagaallamayo kooxaha nabad-diidka iyo dambiyada ka dhaca xuduudahooda.
Gudigan wadajirka ah ayaa muhiimad weyn u leh xoojinta nabadda iyo iskaashiga amni ee labada waddan, gaar ahaan dagaalka ka dhanka ah argagixisada iyo dambiyada xuduudaha ka dhaca.
Wada-hadallada socda ayaa la filayaa in laga soo saaro heshiisyo xoojinaya iskaashiga dhaqaalaha, siyaasadda, iyo amniga, taas oo muhiim u noqon doonta horumarka gobolka Geeska Afrika.
Jabuuti iyo Itoobiya ayaa mar kale muujiyay sida ay uga go’an tahay horumarinta xiriirka walaalnimo ee u dhexeeya labada dal, iyagoo ka shaqeynaya nabadda, xasilloonida, iyo kobaca dhaqaalaha.
