by Abukar Osman
📍 Naypyidaw, Myanmar –
Taliska militariga Myanmar ayaa si cad u diiday codsiyada xabad-joojin ah oo ay soo jeediyeen kooxaha fallaagada si loo fududeeyo gurmadka degdegga ah kadib dhulgariir xooggan oo toddobaadkii hore ku dhuftay dalka.
Dhulgariirka, oo cabbirkiisu ahaa 7.7, ayaa sababay geerida 2,719 qof, halka 400 kale weli la la’yahay, iyo in ka badan 4,000 oo dhaawac ah, sida ay sheegtay wakaaladda wararka ee madax-bannaan ee Myanmar Now.
Kooxaha fallaagada sida Arakan Army, Myanmar National Democratic Alliance Army, iyo Ta’ang National Liberation Army ayaa si isku mid ah u dalbaday in la joojiyo dagaalka si shacabka loola gaaro gargaar bani’aadamnimo.
Dhanka kale, Dowladda Midnimada Qaran ee mucaaradka ah ayaa ku dhawaaqday xabad-joojin laba toddobaad ah oo bilaabatay 30-kii Maarso, si loogu oggolaado howlaha samatabixinta iyo taageerada shacabka.
Si kastaba ha ahaatee, hoggaamiyaha junta-da militariga, General Min Aung Hlaing, ayaa sheegay in xabad-joojinta laga faa’iideysanayo si kooxahaasi u helaan waqti ay isku abaabulaan.
“Kooxo hubeysan ayaa isu diyaarinaya weerarro cusub, sidaas darteed ciidamada milatarigu waxay sii wadi doonaan howlgallada difaaca,” ayuu yiri Hlaing, mar uu ka hadlayay xaflad lacag ururin ah oo ka dhacday caasimadda Naypyidaw.
Tan iyo afgambigii militariga ee dhacay 2021, Myanmar waxa ay wajahaysaa qalalaase amni, iyadoo dagaallo culus ay ka socdaan gobollo badan, taas oo dhibaato hor leh ku sii kordhisay shacabka ku nool meelaha ay musiibooyinka ka dhaceen.
Warbaahinta gudaha iyo hey’adaha xuquuqul insaanka ayaa cambaareeyay go’aanka milatariga, iyagoo ku baaqay in gargaarka la hormariyo halkii dagaal lagu sii wadi lahaa.
