Boosaaso (Dawan) – Golaha Deegaanka degmada Boosaaso ayaa ku baaqay in si degdeg ah loo qaado tallaabooyin lagu joojinayo gubashada soo noqnoqotay ee doonyaha, iyagoo ka digay in dhacdooyinkaas ay si weyn u saameynayaan dhaqaalaha iyo ganacsiga Puntland.
War-saxaafadeed soo baxay shalay oo Arboco ah ayaa lagu sheegay in goluhu uu kulamo la qaatay hay’adaha Puntland, ganacsatada iyo Rugta Ganacsiga si loo qiimeeyo sababaha iyo saameynta dhacdooyinkan.
Golaha ayaa ugu baaqay dhammaan hay’adaha dowladda, ganacsatada iyo bulshada inay qaataan mas’uuliyad degdeg ah si looga hortago dhacdooyinka soo noqnoqday ee gubashada doonyaha, kuwaas oo si toos ah u saameeyay dhaqaalaha degmada iyo guud ahaan gobolka.
“Dhacdooyinkan soo noqnoqday waxay sababeen khasaare dhaqaale oo aad u ballaaran, waxayna saameyn ku yeesheen ganacsiga, shaqo-abuurka iyo dhaqaalaha guud ee Boosaaso,” ayaa lagu yiri war-saxaafadeedka.
Golaha ayaa soo jeediyay in la dejiyo qorshe qaran oo degdeg ah oo lagu yareynayo khataraha gubashada doonyaha, isla markaana la dhiso awood jawaab-celin degdeg ah oo ay ka shaqeeyaan kooxo si gaar ah u tababaran.
Sidoo kale, waxaa la dalbaday in la xoojiyo awoodda dab-damiska ee dekedda Boosaaso, oo ay ku jiraan qalabaynta doonyo dab-damis oo ka howlgala badda si loo xakameeyo fiditaanka dabka marka uu dhaco.
