Itoobiya, 17 Nofeembar 2025 — Magaalada Jigjiga ayaa Axaddii lagu furay Isbitaal Life Care Hospital, oo ah xarun caafimaad oo si buuxda u maalgeliyay ganacsato dhallinayaro ah oo kasoo jeeda Deegaanka Soomaalida, kuwaas oo isugu jira qurbajoog iyo degaanka. Mashruucu waxa uu ku kacay in ka badan 400 milyan oo birr, una dhiganta qiyaastii $2.58 milyan.
Cisbitaalka cusub, oo shaqo-abuur u sameeyay illaa 70 qof hadda, ayaa qayb ka noqonaya dadaallada lagu ballaarinayo adeegyada caafimaadka ee gobolka, iyadoo maalgashadayaashu sheegeen inay ka faa’iideysteen fursadaha dhaqaale ee deegaanka.
Munaasabadda furitaanka waxaa ka qeyb galay Wasiirka Maaliyadda Dayib Axmednuur, Wasiir ku xigeenka Caafimaadka Maxamed Ayaanle, Wasiir ku xigeenka Horumarinta Dooxooyinka Cali Badal, iyo Ku-xigeenka Duqa Jigjiga Khadar Budul, waxaana goobta ka muuqday qeybaha kala duwan ee bulshada.
Mas’uuliyiinta ayaa sheegay in maamulka deegaanka iyo xisbiga talada haya ay mudnaanta siinayaan dhiirrigelinta maalgashiga bulshada lagu horumarinayo, gaar ahaan adeegyada caafimaadka, si dadka deegaanka loo gaarsiiyo adeeg hufan oo casri ah.
