Godey: Ina ka badan kun qoys oo ka baxay ku-tiirsanaanta gargaarka

Itoobiya, 18 Janaayo 2026 (Dawan) — Maamulka magaalada Godey ayaa u dabaaldegay guul lagu tilmaamay mid taariikhi ah, kaddib markii 1,257 qoys ay ka baxeen ku-tiirsanaanta gargaarka bini’aadannimo una gudbeen heer isku-filnaansho dhaqaale iyo xasilooni dakhli.

Wakaaladaha shaqo-abuurka iyo damaanad-qaadka cuntada ee Maamulka Magaalada Godey ayaa munaasabad dabaal deg ah u qabtay qoysaskan, kuwaas oo ka faa’iideystay Mashruuca Shabakadda Badbaadada, Wax-soo-saarka iyo Shaqada (UPSNJP), wajigiisa labaad.

Munaasabadda, oo ay ka soo qeyb galeen mas’uuliyiin ay ka mid yihiin Maareeyaha Wakaaladda Shaqo-abuurka ee Maamulka Magaalada Godey, Bashiir Axmed, iyo hawl-wadeeno ka socday Xafiiska Xirfadaha iyo Shaqo-abuurka Dowlad-Deegaanka Soomaalida (DDS), ayaa lagu soo bandhigay natiijooyinka mashruuca iyo saameynta uu ku yeeshay ka-qeybgalayaasha.

Mas’uuliyiintu waxay sheegeen in qoysaska qalin-jabiyay ay gaareen horumar la taaban karo, gaar ahaan dhanka xasilinta dakhliga, kor u qaadista wax-soo-saarka, iyo barashada xirfado shaqo oo joogto ah, taas oo u sahashay inay ka baxaan ku-tiirsanaanta gargaarka.

Gunaanadka xafladda, abaal-marinno ayaa la guddoonsiiyay qoysaskii hormuudka ka ahaa ka-faa’iideysiga mashruuca, kuwaas oo muddadii uu socday muujiyay dadaal, adkeysi, iyo ka-go’naansho lagu gaaray isku-filnaansho nololeed.

Mashruuca UPSNJP, gaar ahaan wajigiisa labaad, ayaa lagu tilmaamay mid wax-ku-ool ah oo saameyn togan ku yeeshay nolosha 1,257-ka qoys ee ka faa’iideystay, iyadoo la xoojiyay awooddooda dhaqaale, xirfadeed, iyo isku-filnaansho bulsho.

Mashruucan ayaa sidoo kale si ballaaran looga hirgeliyay magaalooyin kale oo ka tirsan Dowlad-Deegaanka Soomaalida, oo ay ku jirto Jigjiga, halkaas oo in ka badan 3,000 qoys ay horay uga faa’iideysteen.