Jigjiga (Dawan ) – Dowlad Deegaanka Soomaalida ayaa Talaadadi ku dhawaaqday qorshe degdeg ah oo biyo-dhaamin ah, kaas oo lagu gaarsiinayo 57 degmo oo ka tirsan deegaannada ay abaartu saameysay. Go’aankan ayaa yimid kaddib kulan uu shir guddoominayay Madaxweynaha Dowlad Deegaanka Soomaalida, Mustafe Muxumed Cumar, oo ay yeesheen Golaha Fulinta, laguna falanqeeyay xaaladda jiilaalka adag iyo gurmadka socda.
Kulanka ayaa lagu go’aamiyay in 60 milyan oo Birr loo qoondeeyo biyo-dhaamin socon doonta muddo hal bil ah, si loo dardargeliyo gaarsiinta biyaha dadka iyo xoolaha ay saameysay biyo-yaraantu.
Wasiirka Xafiiska Maareynta Khataraha iyo Masiibooyinka ee Dowlad Deegaanka Soomaalida, Axmed Yaasiin Sheekh Ibraahim, ayaa sheegay in si qoto dheer looga dooday xaaladda abaarta iyo tallaabooyinka gurmad ee la wado. Wuxuu xusay in jiilaal adag uu ka jiro qaybo badan oo ka mid ah deegaanka, isla markaana dowladdu ay waddo dadaallo ay ka mid yihiin biyo-dhaamin, raashin gargaar, calafka xoolaha iyo adeegyo caafimaad.
Sidoo kale, wuxuu tilmaamay in hore loo qorsheeyay gaarsiinta raashin gargaar ah oo la gaarsiiyay 57 degmo, iyadoo la wado qorshe lagu gaarsiinayo degmooyinka haray.
