Soomaaliya, 3 Diseembar 2025 — Wasaaradda Arrimaha Gudaha ee Jarmalka ayaa oggolaatay in lagu galo dalka laguna degganaado baasaboorka diblomaasiga ah ee Soomaaliya, nooca 2013, sida lagu sheegay go’aan lagu daabacay Wargeyska Rasmiga ah ee Federaalka Jarmalka (Bundesanzeiger) 1-dii Diseembar 2025.
Go’aanka oo ka soo baxay Wasaaradda Arrimaha Gudaha ee Jarmalka ayaa xusay in baasaboorkan — oo tan iyo 2018 loo aqoonsanaa oo keliya in lagu bixi karo dalka (departure) — hadda la aqbalayo in lagu galo Jarmalka iyo in lagu deggenaado si sharci ah muddo laba sano ah laga bilaabo maalinta la daabacay.
Bayaanka wasaaraddu wuxuu ahaa sidan:“Baasaboorka diblomaasiga ah ee Jamhuuriyadda Federaalka Soomaaliya, nooca 2013, waxaa la aqoonsanayaa gelitaanka iyo deggenaanshaha muddo laba sano ah laga bilaabo maalinta daabacaadda. Go’aannadii hore ee taa khilaafaya waa la laalay.”
Amarku wuxuu intaas ku daray in dhammaan go’aamadii hore ee ka soo horjeeday aqoonsigan la buriyay, isla markaana oggolaanshahan dib looga noqon karo haddii duruufuhu sidaas qasab ka dhigaan. Waxa kale oo la xaqiijiyay in wadatashadii sharcigu farayay ee lala yeelan lahaa Wasaaradda Arrimaha Dibadda ee Jarmalka ay si buuxda u dhacday.
