Madaxweyne Xasan oo berri ku wajahan Addis Ababa

Muqdisho, 21 Janaayo 2026 (Dawan) - Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa la filayaa inuu Khamiista u safro magaalada Addis Ababa, halkaas oo uu kaga qeyb galayo munaasabadda dabaal-degga sanad-guurada 90-aad ee aasaaska Ciidanka Cirka Itoobiya, taas oo ka socon doonta dalkaas 23 ilaa 27-ka Janaayo.

Sida ay inoo xaqiijiyeen ilo xog-ogaal ah oo ku dhow labada madaxtooyo, Madaxweynaha Soomaaliya iyo Ra’iisul Wasaaraha Itoobiya ayaa yeelan doona kulan laba geesood ah.

Ajandayaasha la filayo in laga wada hadlo waxaa ka mid ah suurtagalnimada in Ra’iisul Wasaare Abiy Ahmed uu dhexdhexaadiyo Madaxweynaha Soomaaliya iyo Madaxweynaha Imaaraadka Carabta, Maxamed bin Zayed, kaddib go’aankii ay Soomaaliya ku saabsanaa ka bixitaanka joogitaanka milatari ee Imaaraadka iyo burinta dhammaan heshiisyadii laba geesoodka ahaa ee labada dal.

Itoobiya ayaa xiriir dhow la leh Israa’iil iyo Dowladda Isutagga Imaaraatka Carabta, waxayna sidoo kale ka mid tahay dalalka aan si cad u muujin mowqifkooda ku aaddan arrinta aqoonsiga Somaliland.

Safarka Madaxweynaha Soomaaliya ee Itooobiya ayaa imanaya xilli la isu diyaarinayo shir madaxeedka Midowga Afrika, kaas oo horraanta bisha Febraayo ka qabsoomi doona magaalada Addis Ababa, iyadoo arrimo gobolka la xiriira, gaar ahaan kuwa ku saabsan Israa’iil iyo Somaliland, ay yihiin kuwo si weyn indhaha loogu hayo.

Safarka Madaxweynaha, oo ah kii 9-aad ee uu ku tago Itoobiya muddo 3 sano iyo 8 bilood ah oo xileedkiisa labaad ah, ayaa la xiriira aqoonsiga Israel ee Somaliland, iyadoo loo diyaar garoobayo shir madaxeedka Midowga Afrika oo horraanta Febraayo ka qabsoomi doona Addis Ababa.