Mahad Maxamed Salaad, waxa uu sanadkii 1980kii ku dhashay magaalada Dhuusamareeb ee xarunta gobolka Galgaduud.
Waxbarashadiisii dugsiyada Hoose, Dhexe uu qeyb ka mid ah ku qaatay gudaha Soomaaliya, halka qeyb-na uu ku qaatay dalka Kenya. Mahad Salaad, waxa uu waxbarashadiisii dugsiga sare, heerkiisa koowaad iyo labaad ee jaamacadda ku soo qaatay magaalada Qaahira ee dalka Masar.
Mahad Maxamed Salaad, waxa uu siyaasada ku soo biiray sanadkii 2011kii, isagoo uu ka mid noqday xubnihii xisbigii PDP. Sanaddii 2012 ayaa Mahad Salaad markii ugu horreysay loo doortay xildhibaan ka tirsan Golaha Shacabka ee Baarlamaanka Soomaaliya.
Sanadkii 2013 waxaa uu ka mid noqday Golaha Wasiirada Soomaaliya, isaga oo loo magacabay Wasiir ku xigeenka Wasaaradda Arrimaha Dibadda, kaddibna waxa uu u wareegay dhanka Madaxtooyada markaas oo loo dhiibay Wasiiru-dowlaha Madaxtooyada. Sanadkii 2016 ayaa mar 2aad Mahad Salaad loo doortay xildhibaan ka tirsan Baarlamaanka Soomaaliya. Sidoo kale mar saddexaad 2021 ayaa loo doortay xubin ka tirsan Baarlamaanka JFS.
May 26, 2022 madaxweyne Xasan Sheekh ayaa dib u doorashadiisa ka dib Mahad Salaad u magacaabay agaasimaha hay’adda Nabadsugidda iyo Sirdoonka Qaranka, isagoo xilkaas hayay illaa April 4, 2024, laguna beddalay Cabdullaahi Maxamed Cali Sanbaloolshe oo xilkaas hayay tan iyo June 1, 2025, dibna uu ugu wareejin doono agaasimihii uu xilka kala wareegay, Mahad Maxamed Salaad.
