Soomaaliya, 11 November 2025 — Hay’adda Aqoonsiga iyo Diiwaangelinta Qaranka (NIRA) ayaa Isniintii si rasmi ah u furtay xarun cusub oo loogu talagalay diiwaangelinta dadweynaha iyo bixinta kaararka aqoonsiga, taasoo ku taalla degmada Wadajir ee magaalada Muqdisho.
Xaruntan waxaa si rasmi ah xarigga uga jaray Wasiirka Arrimaha Gudaha, Federaalka iyo Dib-u-heshiisiinta, Cali Yuusuf Cali “Cali Xoosh,” oo uu wehliyay Maareeyaha Guud ee NIRA, Cabdiwali Cali Cabdulle “Timacadde.”
Wasiirka Arrimaha Gudaha Cali Xoosh ayaa goobta ka hadlay isagoo sheegay in xaruntani ay qayb ka tahay dadaallada dowladda ee lagu ballaarinayo adeegyada dadweynaha, isagoo ammaanay horumarka NIRA ku samaysay nidaamka diiwaangelinta qaranka.
“Tallaabadan waxay qayb ka tahay qorshaha dowladda ee lagu dhoweynayo adeegyada bulshada. Waxaan bogaadinayaa NIRA sida ay u xallisay caqabadihii hore iyo sida ay u kala habeysay nidaamka diiwaangelinta,” ayuu yiri Wasiir Cali Xoosh.
