Aadan Yabaal (Dawan ) – Hay’adda Sirdoonka iyo Nabadsugidda Qaranka (NISA) ayaa sheegtay in iyada oo kaashaneysa saaxiibada caalamiga ah ay si wadajir ah u fuliyeen howlgal duqeymo ah, laguna beegsaday guri ku yaalla xaafadda Howlwadaag ee degmada Aadan Yabaal.
NISA ayaa sheegtay in howlgalkaasi uu bartilmaameedsaday horjoogayaal ka tirsan kooxda Al-Shabaab oo ku sugnaa gurigaas, iyadoo howlgalka uu dhacay xalay saqdhexe. Gurigan ayaa la sheegay inuu ahaa goob ay ku shiraayeen horjoogayaal ka tirsan kooxda Al-Shabaab.
Qoraal ka soo baxay NISA ayaa lagu sheegay in howlgalkaasi uu si guul leh uga dhacay goobtaas, iyada oo gurigaas ka kacay dab xooggan, oo jug culus laga maqlay guud ahaan degmada Aadan Yabaal, taasoo muujinaysa in gurigaasi uu ahaa keyd hubka culus iyo walxaha qarxa.
