Soomaaliya, 17 Oktoobar 2025 — Rag hubeysan oo la tuhunsan yahay inay Al-Shabaab ka tirsan yihiin ayaa weerar ku qaaday gaari boolis ah Khamiistii, jidka u dhexeeya Mahaday iyo Jowhar ee gobolka Shabeellaha Dhexe.
Sida uu sheegay Taliyaha Booliska saldhigga Jowhar, Cabdifaatax Arwaax Aadan, weerarku wuxuu dhacay agagaarka 2 duhurnimo, markii gaari nooca ciidan oo ka tirsan Saldhigga Booliska Jowhar la weeraray intii uu ku jiray howshiisa maalinlaha ah.
“16ka Oktoobar 2025, koox burcad hubeysan ayaa weerartay gaari boolis ah inta u dhaxaysa jidka Mahaday–Jowhar, saacaddu markay ahayd 2 duhurnimo. Gaarigan wuxuu ka tirsan yahay Saldhigga Booliska Jowhar, wuxuuna ku jiray hawshiisa maalinlaha ah,” ayuu yiri Taliyaha Arwaax.
Sida uu sheegay taliyaha Ciidamada ammaanka ayaa si dhakhso ah uga falceliyey weerarka waxayna raad-raac ku bilaabeen ragga weerarka geystay, kuwaasoo la rumeysan yahay inay xiriir la leeyihiin shabakadaha argagixisada ee ka howlgala gobolka.
