Muqdisho – 10 Janaayo 2026- (Dawan)- Shirkadda diyaaradaha ee Saudi Airlines ayaa lagu wadaa inay dhowaan bilowdo duulimaadyo toos ah oo ay ku timaado magaalada Muqdisho, kaddib marka la soo gabagabeeyo qiimeyn farsamo oo dhammaystiran oo lagu sameeyay Garoonka Caalamiga ah ee Aadan Cadde, sida ay xaqiijiyeen mas’uuliyiinta duulista rayidka ee Soomaaliya.
Agaasimaha Guud ee Hay’adda Duulista Rayidka Soomaaliyeed, Axmed Macallin Xasan, ayaa sheegay in wafdi farsamo oo ka socday Boqortooyada Sacuudiga uu kormeer ku yimid garoonka qiyaastii bil ka hor, wafdigaas oo sameeyay qiimeyn la xiriirta badbaadada iyo kaabayaasha garoonka.
Isaga oo ka hadlayay munaasabad lagu furayay goob cusub oo gawaarida la dhigto oo laga hirgeliyay gudaha garoonka, ayuu Xasan xusay in inkasta oo warbixinta kormeerka lagu tilmaamay ay jireen caqabado dhanka kaabayaasha ah, haddana ay muujisay xiisaha sii kordhaya ee ay shirkadaha caalamiga ah u qabaan duulista Soomaaliya.
“Waa arrin dhiirrigelin leh in shirkado caalami ah ay u tartamayaan inay duulimaadyo ku yimaadaan Muqdisho. Duulimaadyada Sacuudiga waxay bilaaban doonaan dhowaan, sidoo kalena waxaa jira xiiso ka imanaya shirkado Yurub ah,” ayuu yiri Agaasimaha Guud.
Furitaanka goobta cusub ee baarkinka gawaarida ayaa lagu tilmaamay tallaabo istaraatiiji ah oo qeyb ka ah dadaallada lagu buuxinayo shuruudaha badbaado iyo fududeyn ee Ururka Caalamiga ah ee Duulista Rayidka (ICAO). Qiimeyn dhowaan ay sameysay ICAO, oo ah tii ugu horreysay ee noocaas ah ee lagu sameeyo garoonka, ayaa muujisay khataro la xiriira ciriiriga iyo baarkin la’aanta, kuwaas oo saameyn kara hawlgallada degdegga ah.
