Soomaaliya oo Ka Qayb Galaysa Kalfadhiga 51-aad ee Golaha Wasiirrada Arrimaha Dibadda

By Abukar Osman

Istanbul (Dawan) – Wasiirka Arrimaha Dibadda iyo Iskaashiga Caalamiga ee Soomaaliya, Abdisalaam Cabdullaahi Cali, ayaa ka qaybgalay furitaanka kalfadhiga 51-aad ee Golaha Wasiirrada Arrimaha Dibadda ee Ururka Iskaashiga Islaamka (OIC), kaasoo maanta ka furmay Istanbul, Turkiya. Kulankan oo socon doona laba maalmood (21–22 Juun 2025) ayaa fursad muhiim ah u ah Soomaaliya inay ka qayb qaadato iskaashiga caalamiga ah ee dalalka Islaamka.

Mawduuca kulanka sannadkan, "Ururka Iskaashiga Islaamka ee Dunida Isbeddelaysa," wuxuu ka tarjumayaa isbeddellada joogtada ah ee siyaasadda caalamiga ah, gaar ahaan dunida Muslimka. Kalfadhigan ayaa la filayaa inuu noqdo mid ka mid ah kulammada ugu ballaaran ee taariikhda OIC, iyadoo 1,000 ka qaybgalayaal ay joogaan oo ka socda dalalka xubnaha ka ah Ururka, oo ay ku jiraan 43 wasiir iyo shan wasiir ku xigeen.

Golaha Wasiirrada Arrimaha Dibadda (CFM) ee Ururka Iskaashiga Islaamka (OIC) waa hay'adda ugu sareysa ee qaadata go'aanada OIC. Golaha Wasiirrada wuxuu ka kooban yahay wasiirrada arrimaha dibadda ee 57 xubnood ee dalalka Ururka, wuxuuna kulmaa sanadkiiba hal mar, waxaana sidoo kale uu qaban karaa kulamo gaar ah oo loogu talagalay arrimo degdeg ah.

Kulanka, oo ay martigelisay Turkiya, ayaa soo jiiday ka qaybgalayaal heer sare ah, taasoo muujinaysa muhiimadda kulankan iyo doorka sii kordhaya Ururka ee arrimaha caalamiga ah.

Wasiir Abdisalaan, iyo wakiillada kale ee OIC, ayaa ka qayb galaya doodaha ku saabsan arrimo badan oo saameeya dunida Muslimka, oo ay ka mid yihiin siyaasadda, dhaqaalaha, iyo amniga, iyadoo si gaar ah loo fiirinayo xasilloonida iyo iskaashiga gobolka.

Mid ka mid ah mowduucyada ugu muhiimsan ee laga hadlayo ayaa ah xiisadaha sii kordhaya ee u dhexeeya Israa'iil iyo Iran.

Marka lagu daro doodaha guud, Wasiir Abdisalaan ayaa sidoo kale lagu wadaa inuu kulamo gaar ah la yeesho wasiirrada arrimaha dibadda ee dalalka kale ee ka qayb galaya, si loo xoojiyo xiriirka diblomaasiyadeed ee Soomaaliya iyo dalalka Islaamka.

Kulammadan ayaa sidoo kale loo arkaa inay muhiim u yihiin sare u qaadista xiriirka Soomaaliya ee dalalka OIC iyo dhexdhexaadinta siyaasadeed.

Kalfadhigan wuxuu ku soo beegmaysaa xilli Soomaaliya, oo ka mid ah xubnaha Ururka Jamacadda Carabta iyo Ururka Iskaashiga Islaamka, ay hadda joogto kursiga aan joogtada ahayn ee Golaha Ammaanka Qaramada Midoobay.