Soomaaliya oo shatiyo siisay shirkadaha maalgelinta yar-yar ee aan keydka ahayn

Soomaaliya, 11 Nofeembar 2025 — Bankiga Dhexe ee Soomaaliya (BDhS) ayaa bixiyay shatiyadii ugu horreeyay ee hay’adaha maalgelinta yar-yar ee aan dhigaalka qaban (NDMTFIs), taasoo talaabo muhiim ah u ah xoojinta nidaamka maaliyadeed ee dalka.

War-saxaafadeed uu maanta shaaciyey Bankiga kuna taariikhaysanaa 9 Nofeembar 2025 ayaa lagu sheegay in todoba shirkadood ay heleen shati ka dib markii ay buuxiyeen dhammaan shuruudihii shati-siinta kuwaas oo kala ah : KIMS Microfinance Institution, Bushra Microfinance Ltd, Maal Microfinance Ltd, Midnimo Microfinance, RAAS Microfinance, Asal Microfinance, iyo Haldoor Microfinance.

Shati-siintan ayaa imaanaysa kadib dib-u-eegistii lagu sameeyay Sharciga Hay’adaha Maaliyadda bishii May 2025 iyo soo bandhigida Xeerka Shati-siinta Hay’adaha Maalgelinta Yar-Yar ee aan Dhigaalka Qaadan. BDhS ayaa sheegay in xeerarkan ay siinayaan nidaam sharci oo korjoogteyn lagu sameeyo, isla markaana kor loogu qaadayo maamulka, hufnaanta, iyo ilaalinta macaamiisha.

“Shati-siinta kooxdii ugu horreysay ee bixiya maalgelinta yar-yar waa dhacdo taariikhi ah oo muujineysa horumarka la gaaray nidaamka maaliyadeed ee Soomaaliya,” ayuu yiri Guddoomiyaha BDhS, Cabdiraxmaan Maxamed Cabdullahi. “Tani waxay muujinaysaa ballanqaadka Bankiga Dhexe ee dhisidda nidaam maaliyadeed oo loo dhan yahay, oo lagu kalsoonaan karo, si adeegyada maaliyadeed loo gaarsiiyo dhammaan shacabka Soomaaliyeed.”

Bankiga Dhexe ayaa adkeeyay in waqtiga shati-bixintu uu furmay 6 Juun 2025, lagana qaadanayay codsiyada muddo lix bilood ah, ilaa 6 Diseembar 2025. Shirkadaha aan buuxin shuruudaha shati-siinta waxaa laga qaadi doonaa tallaabo sharci oo waafaqsan Sharciga Hay’adaha Maaliyadda.

Shirkadaha shatiyaysan ayaa laga filayaa inay bixiyaan adeegyo maaliyadeed oo yar-yar, gaar ahaan qoysaska, ganacsiyada yaryar, haweenka, iyo dhallinyarada aan weli qeyb ka ahayn nidaamka bangiyada rasmiga ah, iyagoo kaalin muhiim ah ka qaadan kara horumarinta adeegyada maaliyadeed iyo kobcinta dhaqaalaha dalka.