Xulka Soomaaliya oo taariikh ka dhigay isreeb-reebka Koobka Afrika

Mauritius, Maarso 31 (Dawan) – Xulka qaranka Soomaaliya ayaa gaaray guul taariikhi ah kadib markii uu rigooreyaal 4–2 kaga adkaaday Mauritius, oo uu marti u ahaa caawa oo Talaado ah, taas oo u sahashay inay u gudbo wareegga group-ka ee isreeb-reebka Koobka Qaramada Afrika 2027 (AFCON).

Guushan ayaa noqotay markii ugu horreysay ee Soomaaliya ay gaarto wareegga ugu weyn ee isreeb-reebka tartanka ugu weyn kubadda cagta Afrika.

Kadib barbaro 0–0 ah oo labada lugood ah — lugtii hore oo lagu ciyaaray Mozambique Jimcihii hore iyo lugtii labaad oo ka dhacday Saint Pierre — labada dhinac ayaa ku guuldareystay inay gool dhaliyaan 90-kii daqiiqo.

Ciyaarta ayaa ugu dambeyn lagu kala saaray rigooreyaal, halkaas oo Soomaaliya ay si guul leh u dhalisay afar rigoore.

“Guushan waxay dhiirrigelin u tahay horumarka kubadda cagta dalka,” ayuu yiri Cali Cabdi Maxamed, madaxweynaha Xiriirka Kubadda Cagta Soomaaliya, sida lagu sheegay qoraal lagu daabacay Facebook kadib ciyaarta.

Wuxuu ammaanay ciyaartoyda, isaga oo ku tilmaamay inay muujiyeen “qalbi, nidaam iyo go’aan adag,” isla markaana sheegay in guushan ay farxad gelisay Soomaalida ku nool gudaha iyo dibadda.

Soomaaliya ayaa hadda ku biirtay dalalka kale ee gobolka CECAFA sida South Sudan, Eritrea, Burundi iyo Itoobiya, kuwaas oo sidoo kale u gudbay wareegga xiga ee isreeb-reebka.

Xiddigaha Soomaaliya ayaa geli doona isku aadka wareegga group-ka, iyaga oo la tartami doona xulal kale oo heer sare ah si ay ugu soo baxaan wareegga kama dambaysta ah ee AFCON 2027, oo ay wada martigelin doonaan Kenya, Uganda iyo Tanzania.