Xubno Jabhadda ONLF ah oo Cambaareeyey doorashdii Qalbi-Dhagax

Maxamed Cabdi

Jigjiga (Dawan) – Xubno ka tirsan Jabhadda Waddaniga Xoreynta Ogaadeeniya (JWXO) ayaa si xoog leh u canbaareysay shirkii lagu soo gaba gabeeyey Jigjiga, kaas oo lagu sheegayo inuu yahay shir weynaha  5a-aad ee Jabhadda ONLF oo lagu doortay guddoomiyaha cusub ee Jabhadda.

Bayaanka lagu daabacay bogga ONLF ee 30-kii Juun 2025, ayaa ONLF si cad ugu diiday shirka, iyadoo ku tilmaantay inuu yahay dhacdo aan sharci iyo anshax toona lahayn, oo siyaasaddiisa loo qorsheeyey iyadoo ay taageerayaan Xisbiga Barwaaqo (PP), Guddiga Doorashada Qaranka ee Itoobiya (NEBE), iyo maamulka gobolka Soomaalida.

Bayaanka JWXO waxuu sheegay in dhacdadan ay qayb ka tahay ololaha ballaaran ee lagu burburinayo ONLF, si loo xado kheyraadka dabiiciga ah ee Ogaadeeniya, isla markaana looga saaro nidaamka dastuuriga ee federaalka ee ilaalinaya isku-xukunka gobollada.

“Tani ma aha kaliya carqalad siyaasadeed gudaha ah – waa qorshe cad oo lagu doonayo in lagu midabeeyo dhaqdhaqaaq xoreynta oo dhab ah, kaasoo muddo dheer u taagan xuquuqda dadka Soomaalida ee Ogaadeeniya,” ayaa lagu yiri bayaanka JWXO. bayaanka wuxuu ku adkeystay in hoggaamintooda ay si dimuqraadi ah u doorteen dadka, aysan ahayn kuwa ku xiran awoodda siyaasadeed ee Addis Ababa.

“Ma jirto hay’ad dibadda ka socota oo xaq u leh inay naga rido ama naga kaxeeyso dhaqdhaqaaqeenna,” ayaa lagu sheegay bayaanka.

Shirka Jigjiga ayaa 30-kii Juun 2025, ay ku doorteen Cabdikariim Sheekh Muuse (Qalbi-Dhagax) guddoomiyaha cusub ee ururka, kadib codbixin ay sameeyeen ka soo qaybgalayaasha shirweynaha.

Qalbi-Dhagax ayaa badalay C/raxmaan Sh. Mahdi (Maadey), oo horey xilka uga qaadeen xubno ka tirsan Golaha Dhexe ee Ururka Xoreynta Ogaadeeniya (ONLF).

“Ha jirto qalad: nidaamka dastuuriga ee ONLF, qaabdhismeedkeeda hoggaamineed, iyo sharciyadeeda waxay sii ahaayeen kuwo meel adag ku taagan,” ayaa lagu sheegay bayaanka JWXO, iyagoo caddeeyey in aysan oggolaan doonin in la isku dayo in la burburiyo dhaqdhaqaaqooda.

Si kastaba arrintu ha ahaatee, tallaabadaan ayaa muujinaya sii xoogeysanaya khilaafka gudaha ee u dhexeeya hoggaanka sare ee ururka, kaas oo mudooyinkii u dambeeyey soo jiitamayey. Khilaafkan ayaa si muuqata uga dhashay aragtida kala duwan ee ku aaddan hoggaanka iyo qaabka ay ururku u shaqeeyo.