ADDIS ABABA – Jabhadda Xoreynta Qowmiyadda Ogaadeen (ONLF) ayaa mar kale ku celisay sida ay uga go’an tahay fulinta heshiiskii nabadeed ee ay 2018 la gashay Dowladda Federaalka Itoobiya, iyadoo si cad uga soo horjeesatay wax kasta oo kicinaya rabshado.
Bayaanka ayaa jawaab u ahaa warqad dhowaan uu diray Guddoomiyaha ONLF Cabdiraxmaan Mahdi oo ku baaqeysay in la qaado tallaabo hubeysan oo ka dhan ah dowladda Itoobiya.
“Waxaan si buuxda u diideynaa kicin kasta oo rabshado. Warqaddan ma matalayso mowqifka rasmiga ah ee ONLF,” ayaa lagu yiri bayaanka. Waxaa intaa lagu daray: “Ballanqaadkayaga ku aaddan heshiiskii nabadeed ee 2018 waa mid aan leexleexad lahayn, mana aqbaleyno wax kasta oo carqaladeynaya horumarkaasi.”
ONLF waxay ugu baaqday dhammaan daneeyayaasha in ay “xasillooni muujiyaan, taageeraanna geedi-socodka dib-u-heshiisiinta,” iyagoo adkeeyay in xasilloonida lagu gaaray heshiiska nabadeed ay muhiim u tahay mustaqbalka gobolka Soomaalida.
Bayaanku wuxuu ku soo dhammaaday ballanqaad ah in ONLF ay sii wadi doonto dadaalladeeda ku aaddan xalal siyaasadeed oo nabadeed.
