Muqdisho (Dawan)- Qodobada ugu waaweyn wararka dunida oo kooban waxaa ka mid ah:
Maxaas
Kooxda Al-Shabaab ayaa maanta oo Axad ah la wareegtay degmada Maxaas ee gobolka Hiiraan, kaddib weerar lama filaan ah oo ay subaxnimadii hore ku qaadeen magaalada. Dadka deegaanka ayaa u xaqiijiyay Dawan in magaalada ay gashay gacanta kooxda, kaddib dagaal culus oo halkaas ka dhacay, taasoo dhabar-jab ku noqotay ciidamadii deegaanka ee Macawisleyda iyo kuwa dowladda oo halkaas saldhigyo ku lahaa.
Addis Ababa
Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa gaaray magaalada Addis Ababa si uu uga qayb-galo Shirweynaha Labaad ee Qaramada Midoobey ee Dib-u-eegista Nidaamyada Cuntada (UNFSS+4), kaasoo ay si wadajir ah u martigelinayaan Itoobiya iyo Talyaaniga, kana socda xarunta UNECA ee Addis Ababa inta u dhaxaysa 28 ilaa 29-ka Luulyo.
Jabuuti
Madaxweynaha Soomaaliya Xasan Sheekh Maxamuud ayaa ka codsaday Dowladda Jabuuti in ay kaalin muuqata ka qaadato gurmadka loogu tala galay dadka ay abaaruhu saameeyeen ee ku nool gobolka Awdal, ee jamhuuriyadda iskeed ugu dhawaaqday madax-bannaanida ee Somaliland.
Dooxa
Dowladda Qatar ayaa si rasmi ah u martigelisay shirka Guddiga Xiriirka ee Ururka Iskaashiga Islaamka (OIC) u qaabilsan arrimaha Soomaaliya, kaas oo maanta ka furmay magaalada Doha ee dalka Qatar.
Muqdisho
Dowladda Hindiya ayaa sheegtay maalinimadii sabtiga in ay Soomaaliya ugu deeqday gargaar bani’aadannimo oo isugu jira daawooyin, qalab qalliin, iyo agab caafimaad oo muhiim u ah xarumaha daryeelka bulshada.
Afgooye
Hay’adda Sirdoonka iyo Nabadsugidda Qaranka Soomaaliya (NISA) ayaa ku dhawaaqday in laba xubnood oo sar-sare oo ka tirsan kooxda Al-Shabaab lagu qabtay hawlgal habennimadii Sabdida ka dhacay degmada Afgooye ee gobolka Shabeellaha Hoose.
Kismaayo
Ciidamada ammaanka ee Jubbaland oo kaashanaya kuwa Xoogga Dalka Soomaaliyeed gaar ahaan guutada Danab ayaa howlgal ballaaran ka sameeyay qeybo ka mid ah gobolka Jubbada Hoose, iyadoo bartilmaameedku ahaa deegaano lagu tuhmayo in ay ku dhuumaaleysanayeen dagaalamayaal ka tirsan Al-Shabaab.
Khartuum
Ciidanka Taageerada Degdegga ah ee Sudan (RSF) iyo xulafadooda siyaasadeed ayaa Sabtidii si rasmi ah ugu dhawaaqay sameynta dowlad kale oo la tartamaysa tan rasmiga ah ee hadda jirta, tallaabo lagu tilmaamay in ay sii hurinayso colaadda siyaasadeed iyo milateri ee dalka ka taagan.
