By Sayyid Omar
Wasiirka Wasaaradda Diinta iyo Awqaafta Somaliland Cabdullaahi Daahir Jaamac ayaa ku dhawaaqay Salaad roobdoon ah, oo laga tukanayo dhamaan deegaannada iyo degmooyinka Somaliland.
Wasiirka oo ku sugan degmada Ceel-Afweyn ee gobolka Sanaag ayaa salaaddii Jimcaha ka dib sheegay in maalinta Axada ah taariikhduna ku beegan tahay 6 April, 2025 laga doonayo Bulshada ku nool degaannada Somaliland in ay u istaagaan Salaad Roobdoon ah.
Wasiirka ayaa guddoomiyaasha degmooyinka iyo gobollada Somaliland faray in ay hoggaan u noqdaan, sidoo kalena ay abaabulaan shacabka, maalintaasna si wadajir ah looga wada qeyb qaato tukashada salaadda roobdoonka.
Sidoo kale Wasiirka ayaa ku xusay in roobkii uu dib u dhacay, sidaas darteedna ay Wasaaraddu go’aamisay in la iclaamiyo tukashada salaad roobdon ah oo laga tukado dhammaan deegaanada Somaliland.
“Wasaaraddu waxay halkaan ka iclaaminaysaa roobdoon, maadaama roobkii uu dib u dhacay, in Alle aan barino, oo aan roobdoon samayno ayaan go’aan ku gaarnay,” ayuu yiri Wasiirka.
Wasiirka oo tilmaamaya xaaladda abaareed ee ka taagan Somaliland ayaa ku sheegay in ay tahay mid adag, asagoo ku tusaaleeyay in fuustada biyaha ah la iibinayo 30 kun oo shilling-ka Somaliland ah, una dhiganta qaddar $3 ah, sidaas daraadeedna loo baahan yahay in la sameeyo roobdoon, si Alle dadka uga dul qaado abaarta.
