MUQDISHO (Dawan Africa) – Soomaaliya iyo Jabuuti ayaa ku kala saxiixday heshiis is-afgarad (MoU) oo ku saabsan wadatashi siyaasadeed, sida ay ku shaacisay Wasaaradda Arrimaha Dibadda iyo Iskaashiga Caalamiga ee Soomaaliya.
Heshiiskan ayaa Sabtidii lagu saxiixay Muqdisho, waxaana qalinka ku duugay Wasiirka Arrimaha Dibadda Soomaaliya, Cabdisalaan Cabdi Cali, iyo dhiggiisa Jabuuti, Cabdulqaadir Xuseen Cumar, intii lagu guda jiray kulan ka dhacay xarunta Wasaaradda.
Kulanka ayaa lagu falanqeeyay arrimo ay ka mid yihiin iskaashiga amniga, xasilloonida gobolka, iyo arrimaha caalamiga ah ee labada dhinac danwadaagta ka yihiin. Wasaaraddu waxay sheegtay in heshiiskan uu dhisayo hannaan joogto ah oo wadatashi ah, si loo xoojiyo wada-shaqeynta diblomaasiyadeed iyo in la hormariyo mudnaanta labada dal ee heer gobol iyo caalami.
“Waxaan adkeynay oo halkan ku wada saxiixnay heshiis sii kordhinaya wada-shaqayntii soo jireenka ahayd, waxaana rabnaa wixii hadda ka dambeeya inaan dib u qiimeynno sanadkiiba mar ama lixdii biloodba mar,” ayuu yiri Wasiirka Arrimaha Dibadda Soomaaliya.
“Waa fursad kale inaan ku wada heshiinay inaan wada saxiixanno heshiis wadatashi oo dhinaca siyaasadda ah u dhexeeya labada wasaaradood, kaasi oo joogta noqon doona, kuna ekaan doonin booqashooyinka wasiirrada, balse xaqiijin doona in si degdeg ah la isugu wargeliyo labada dhinac,” ayuu yiri Wasiirka Arrimaha Dibadda Jabuuti.
Wasaaradda Arrimaha Dibadda ee Soomaaliya ayaa intaas ku dartay in heshiiskani uu ku dhisan yahay xiriirka taariikhiga ah ee labada dal, kuwaas oo sii wada wada-shaqeynta iyada oo loo marayo habraacyo laba geesood ah iyo mashaariic iskaashi oo wadajir ah.
