Morocco – Xulka qaranka da’yarta Soomaaliya ayaa wajahday guul-darro 3-0 ah kulankii furitaanka Group C ee tartanka TotalEnergies CAF U-17 Africa Cup of Nations oo ka socda dalka Morocco, kaddib markii ay la ciyaareen xulka Tunisia.
Ciyaartan oo lagu qabtay garoonka El Abdi Stadium ee magaalada El Jadida Talaadadii, ayaa Tunisia ay si buuxda u maamushay ciyaarta, iyadoo Soomaaliya ay ku dhibtootay in ay hesho fursado cad oo gool lagu dhalin karo.
Fedi Tayechi ayaa labo gool u dhaliyay Tunisia, halka Anisse Saidi uu isna dhaliyay mid kale, taasoo xulkaas ka dhigtay hoggaanka Group C iyagoo leh farqi goolal oo wanaagsan, maadaama Senegal ay guul kale ka gaartay Gambia isla group-kaas.
Tunisia waxay goolkeedii ugu horreeyay dhalisay daqiiqaddii 6aad markii Tayechi uu si fudud u dhameystiray kubbad ka soo booday goolhayaha, kadib laad uu saaray Saidi. Qeybtii hore ee ciyaarta ayaa lagu dhameeyay 2-0 kaddib gool uu Saidi ka dhaliyay daqiiqaddii 43aad.
Qeybtii labaad, Tunisia ayaa sii kordhisay cadaadiska, Tayechi ayaana mar kale goolka gaaray daqiiqaddii 58aad. Goolkaas ayaa loo baahday in VAR dib u eegto kahor inta aan la oggolaanin. Saidi ayaa isna gool kale dhaliyay daqiiqaddii 71aad, balse waxaa laga diiday sababo la xiriira offside.
Inkastoo laga badiyay, xulka Soomaaliya ayaa muujiyay dadaal iyo geesinimo, waxaana halis galiyay goolka Tunisia dhawr jeer oo uu ugu horreeyay Anas Isse oo sameeyay laad fog oo xooggan. Ciyaartoyda Soomaaliya ayaa dhamaadkii ciyaarta isku dayay weerarro degdeg ah, balse difaaca Tunisia ayaa si wanaagsan isaga caabiyay.
Tunisia ayaa haatan hoggaanka u qabatay Group C, halka Soomaaliya ay u baahan tahay guul kulanka xiga si ay fursad ugu hesho inay u gudubto wareegyada xiga.
Koobka TotalEnergies CAF U-17 Africa Cup of Nations waa tartan uu qabto Xiriirka Kubadda Cagta Afrika (CAF), una gaar ah xulalka qaaradda Afrika ee da’doodu ka hooseyso 17 sano. Sanadkan 2025, tartanka waxaa lagu qabtay dalka Morocco intii u dhaxeysay 30-ka Maarso ilaa 19-ka Abriil, iyadoo ay ka qeybgalayaan 16 dal oo Afrikaan ah.
