Laascaanood – Wasiirka Caddaaladda iyo Dastuurka ee Maamulka SSC-Khaatumo, Cabdi Xasan Maxamed Xijaar, ayaa shalay shaaca ka qaaday in maamulka SSC-Khaatumo uu ku jiro diyaar garowga soo dhaweynta Ra’iisul Wasaaraha Soomaaliya, Xamse Cabdi Barre, oo la filayo inuu gaaro magaalada Laascaanood ee gobolka Sool.
Shir ay isugu yimaadeen waaxyaha kala duwan ee degmada Laascaanood iyo gobollada Sool, oo ay ka qeyb galeen guddoomiyeyaasha degmooyinka, wasiirro, iyo ciidanka booliiska, ayaa looga hadlay sidii loogu diyaar garoobi lahaa imaanshaha Ra’iisul Wasaaraha. Wasiir Xijaar ayaa sheegay in shirkan uu diiradda saaray habsami u socodka qorshayaasha amniga, nadaafadda, iyo diyaarinta shacabka ee ku saabsan booqashada Ra’iisul Wasaaraha.
“Shirkan waxa uu ku saabsan yahay sidii aan ugu diyaar garoobi lahayn imaanshaha Ra’iisul Wasaaraha Soomaaliya ee magaalada Laascaanood ee gobolka Sool waqtiyada soo socda,” ayuu yiri Wasiir Xijaar.
Wasiir Xijaar ayaa intaas ku daray in waqtiga imaanshaha Ra’iisul Wasaaraha Xamse uu shaacin doono goor dhaw, isagoo sheegay in dadka deegaanka ay diyaar u yihiin soo dhaweynta madaxda sare ee dalka.
Wasiirku waxa uu sheegay in maamulka SSC-Khaatumo uu yahay midka ugu amni badan ee hadda jira, isla markaana magaalada Laascaanood ay tahay mid si fiican loo maamulo. Waxaa uu sidoo kale xusay in dadka deegaanka ay diyaar u yihiin soo dhaweynta Ra’iisul Wasaaraha, ayna ku faraxsan yihiin booqashadiisa.
Si kastaba ha ahaatee, hadalkan ayaa imaanaya iyadoo Xafiiska Ra’iisul Wasaaraha Soomaaliya uu horay u beeniyay in Ra’iisul Wasaare Xamsa uu safar ku tegayo Laascaanood. Sarkaal sare oo ka tirsan Xafiiska Ra’iisul Wasaaraha ayaa u sheegay warbaahinta Dawan in wararkaas ay yihiin “been abuur.”
