Maxamed Cabdi
Laascaanood, SSC-Khaatumo – Hoggaamiyaha SSC-Khaatumo, Cabdiqadir Axmed Aw-Ali, ayaa si rasmi ah u furay Warshadda Biyaha ee Laascaanood, taas oo dib loo dhisay kaddib burbur xoogan oo kasoo gaaray dagaalladii dhowaan ka dhacay gobolka.
Warshaddan, oo markii hore maalgelin ku sameeyeen ganacsato maxalli ah, ayaa ah tan ugu weyn ee sifeysa biyaha gudaha SSC-Khaatumo. Kadib burburkii ay la kulantay, ganacsatadani ayaa hogaanka u qabtay dib-u-dhiskeeda, taasoo mar kale muujineysa go’aan adag oo ay ka leeyihiin horumarka bulshada.
Isku-filnaansho iyo Horumarin
Intii lagu guda jiray munaasabadda, Aw-Ali ayaa uga mahadceliyay ganacsatada doorkooda muhiimka ah ee dib-u-dhiska warshadda, isagoo xusay in SSC-Khaatumo ay tahay maamul ku dhisan isku-filnaansho oo aan ku tiirsaneyn caawimaad shisheeye. Waxa uu carrabka ku adkeeyay in maamulka SSC-Khaatumo uu dadaal badan gelinayo sidii loo horumarin lahaa mashaariicda adeegyada aasaasiga ah, gaar ahaan helitaanka biyo nadiif ah.
“Waxaan bishii Oktoobar u dirnay koox qiimeyn ah magaalada, waqtigaasna wax guryo burbursan ah lagama helin. Goobihii colaadda ugu daran ay saameysay waxaa dib loo dhisay muddo laba bilood gudahood ah, xitaa si ka wanaagsan sidii hore,” ayuu yiri Aw-Ali.
Xildhibaan Cali Warsame Dhakawe, Wasiirka Biyaha iyo Macdanta ee SSC-Khaatumo, ayaa sheegay in warshadda biyaha lagu maamuli doono hanaan iskaashi ah oo u dhexeeya SSC Khaatumo iyo ganacsatada gaarka loo leeyahay. Nidaamkan wuxuu xaqiijinayaa in warshaddu noqoto hanti wadaag ah oo ay bulshada iyo maamulkaba ka wada faa’iideystaan.
Taariikhda iyo Muhiimadda Warshadda Biyaha ee Laascaanood
Warshadda Biyaha ee Laascaanood waxaa markii hore loo aasaasay in ay bixiso biyo nadiif ah oo la isticmaali karo, si wax looga qabto caqabadaha la xiriira tayada iyo helitaanka biyaha magaalada. Warshaddu waxay ka kooban tahay ceelal dhowr ah oo lagu qalabeeyay nidaamyo sifaynta biyaha, taas oo ah horumar weyn oo kaabayaasha dhaqaalaha Laascaanood.
Dagaalladii dhacay, gaar ahaan bilowgii 2023, ayaa saameyn weyn ku yeeshay warshadda biyaha, iyada oo ay jiraan eedo ah in goobaha muhiimka ah, oo ay ku jiraan xarumaha biyaha, la beegsaday, taas oo ka sii dartay xaaladda bini’aadanimo ee deegaanka.
Dib-u-soo celinta warshadda biyaha ee Laascaanood waa tallaabo muhiim ah oo wax ka taraysa baahida degdegga ah ee biyaha nadiifta ah ee magaalada Laascaanood iyo nawaaxigeeda. Mashruucani waxa uu yareynayaa caqabadaha caafimaad, wuxuuna muujinayaa adkeysiga iyo wada-shaqeynta ay leeyihiin maamulka SSC-Khaatumo iyo shacabka.
.
