10 arrimood oo ay tahay inaad ka ogaato doorashada Uganda

Kampala (Dawan)- Maanta, dalka Uganda waxa uu galay mid ka mid ah doorashooyinkiisa ugu xiisaha badan ee taariikhda casriga ah. Doorashadan waxaa isku hardinaya awoodda joogtada ah ee Madaxweyne Yoweri Museveni oo dalka soo maamulayay muddo ka badan 40 sano, iyo rabitaanka dhalinyarada iyo mucaaradka cusub ee doonaya isbeddel dhab ah.

Halkan, waxaan idinkula wadaageyna 10 arrimood oo ay tahay inaad ka kala socoto doorashada dalkaas.

1. Muhiimadda doorashadan:

Doorashadan ayaa ah mid xasaasi ah, maadaama ay tijaabinayso sii socoshada xukunka Madaxweyne Yoweri Museveni (81 jir) oo muddo ka badan 40 sano dalka ku xakumayay gacan adag. Dhalinyarada dalka oo ka badan 75% oo ay la daalaa dhacaya shaqo la’aan waxayna doonayan inay arkaan isbedel ku yimaada hoggaanka dalka.

Doorashadu waa fursad lagu qiyaasi karo awoodda nidaamka hadda jira iyo rabitaanka isbeddel ee jiilka cusub.

2. Yaa ku tartamaya doorasaha?

Madaxweyne Museveni ayaa dadaal ugu jiro inuu kursiga xajisto markii toddobaad, isagoo oo lasoo shar tegay olole ku saleyn khibraddiisa iyo siyaasadda xasiloon.

Musharraxa ugu xooggan ee ka soo horjeeda Museveni, waa Robert Kyagulanyi, oo loo yaqaan Bobi Wine (43 jir). Waa fanaan hore iyo hogaamiye siyaasadeed oo ka tirsan Xisbiga Midowga Qaranka (NUP), isagoo xoogga saaraya in lasoo afjaro xukunka oo ku magacaabay “kalitalisnimada”.

3. Tartanka xagga baarlamaanka:

Xisbiga talada haya ee National Resistance Movement (NRM) ayaa weli haysta aqlabiyadda baarlamaanka, iyadoo qaar ka mid ah musharrixiisa ay guuleystaan tartan la’aan, taasoo adkeynaysa in mucaaradku helo kuraas badan. Hase yeeshee, mucaaradku waxa uu xoogga saaraya magaalooyinka waaweyn sida Kampala oo ay ku leeyihiin taageero fara badan.

4. Kaalinta dhalinyarada:

Dhalinyaradu waa in ka badan 75% bulshada, waxaana ay yihiin xoogga go’aaminya doorashada. Bobi Wine wuxuu adeegsanayaa muusikada soo jiidaneysa dhallinyarada iyo baraha bulshada si uu u helo taageerada dhallinyarada iyo jiilka cusub, inkastoo oo ay dowladdu dhowr jeer xayirtay internet-ka.

5. Doorka ciidamada:

Ciidamada qalabka sida ayaa door muhiim ah ka ciyaara sugidda doorashada, balse waxaa lagu eedeeyaa taageerada xisbiga talada haya iyo caburinta mucaaradka. Muhoozi Kainerugaba, wiilka madaxweynaha oo ah taliyaha guud ee ciidamada, ayaa loo arkaa “nin awood leh” oo ka shaqeeya daaha gadaashiisa, isagoo hubinaya daacadnimada ciidamada.

6-.Maxay dadku daneynayaan?

Arrimaha dhaqaalaha iyo xoriyadda ayaa ah kuwo ugu muhiimsan ee ay dadku doonayan. Shaqo la’aanta dhallinyarada iyo musuqmaasuqa ayaa ah caqabado waaweyn. Museveni wuxuu ballan qaaday horumar dhaqaale iyo fursado cusub, halka Bobi Wine uu ku doodayo isbeddello sharci iyo xoriyad bulsho, oo ay ku jiraan sii deynta maxaabiista siyaasadeed.

7. Saameynta gobolka:

Xiisadaha ka jira dowladaha deriska la ah Uganada, sida Kongo iyo Rwanda ayaa door ka ciyaaraya doorashada. Museveni waxa uu ka faa'iideysanaya cabsida dhanka amniga, waxa uuna ku doodaya in baahi wayn loo qabo "hogaamiye ciidan ah oo khibrad leh”, isaga oo mucaaradka ku eedeeya had iyo jeer inay taageero ka helaan dibadda.

8. Maxaa dhacaya haddii Museveni guuleysto?

Guusha Museveni waxay keeni kartaa xasilooni la qasbay, iyadoo suuragal ah in dhalinyaradu ay billaabaan mudaaharaadyo ballaaran. Waxaa laga yaabaa in wiilkiisa Muhoozi uu sii wado qorshaha siyaasadeed ee uu ku doonayo inuu mustaqbalka la wareego xukunka.

9. Maxaa laga filanaya mucaaradka?

Mucaaradku waxay u diyaarsan yihiin inay ka hor yimaadaan natiijada doorashada haddii ay dhacdo in lagu shubto, waxayna ay ku hanjabaan “gadood bulsho” haddii dariiqyada sharciga ah fashilmaan. Dowladda ayaa horey uga digtay in baraha bulshada lagu baahiyo natiijo aan rasmi ahayn.

10. Saameynta doorashadu ku leedahay Bariga Afrika:

Doorashadan waxay muujinaysaa dhibaatada ka jirta bariga Afrika ee la xiriirta in si nabad ah xilka loola kala wareego ama la qabto doorashooyiin hufan. Uganda waxay laf-dhabar u tahay amniga gobolka, iyada oo ka mid ah dowladaha ku yaboohay ciidamada Afrikaanka ah ee nabad ilaalinta u jooga Soomaaliya.

Haddii Museveni sii joogo xukunka, waxay ka dhigantahay in awooddiisi ku dhisneed siyaasadda ciidameysan ay weli jirto balse haddii uu isbedel yimaado, waxay farriin u direysa hoggaamiyaasha gobolka ee rajada ka qaba inay xukunka sii haystaan mudda dheer.