Muqdisho (Dawan) – Guddoomiyaha Golaha Shacabka ee Baarlamaanka Federaalka Soomaaliya, Sheekh Aadan Maxamed Nuur (Madoobe), ayaa Isniintii la kulmay Ergeyga Gaarka ah ee Qaramada Midoobay u qaabilsan Soomaaliya, James Swan, si ay uga wada hadlaan geeddi-socodka dib-u-eegista dastuurka, xilli ay jirto xiisad siyaasadeed oo sii kordheysa.
Kulankan ayaa ku soo beegmay xilli xasaasi ah, iyadoo Baarlamaanku qorsheynayo inuu Arbacada u codeeyo wax-ka-beddelka cutubyo ka tirsan dastuurka kumeelgaarka ah. Tallaabadan ayaa wajahaysa diidmo xooggan oo uga imaaneysa hoggaamiyeyaasha mucaaradka iyo qaar ka mid ah dowlad-goboleedyada xubnaha ka ah dowladda federaalka.
Bayaan ka soo baxay Golaha Shacabka ayaa lagu sheegay in Guddoomiyaha iyo Ergeyga Gaarka ah ay ka wada hadleen howlaha Baarlamaanka iyo horumarka laga gaaray dib-u-eegista dastuurka. Guddoomiye Madoobe ayaa xusay in dadaallada lagu dhameystirayo dastuurka ay marayaan “heer wanaagsan.”
Soomaaliya waxay ku shaqeyneysay dastuur kumeelgaar ah tan iyo 2012, waxaana dowladihii kala dambeeyay ay ku adkaatay dhameystirkiisa.
Si kastaba ha ahaatee, geeddi-socodkan ayaa wajahaya caqabado waaweyn, iyadoo mucaaradka iyo qaar ka mid ah dowlad-goboleedyadu ay ku eedeeyeen dowladda federaalka inaysan jirin wadatashi loo dhan yahay, isla markaana isbeddelladan lagu doonayo in awoodda la isku koobo.
