Puntland oo ugu baaqday beesha caalamka inay soo farageliso siyaasadda Soomaaliya

Soomaaliya (Dawan)– Madaxda Puntland iyo qaar ka mid ah xildhibaannada ku metela Labada Aqal ee Baarlamaanka Federaalka Soomaaliya, oo qaab fogaan arag ah u shiray, ayaa war-murtiyeed kasoo saaray xaaladda siyaasadeed ee dalka, iyada oo ugu baaqay beesha caalamka inay soo farageliso xaaladda siyaasadeed ee Soomaaliya.

War-murtiyeedka ayaa ka koobnaa lix qodob oo kala ahaa dagaalka ay Puntland kula jirto Daacish, cambaareyn la xiriirta laba jeer oo la sheegay in diyaarado isaga gooshayay Garoowe iyo Muqdisho laga celiyay hawada, diidmada wax-ka-beddelka dastuurka, iyo qodob si toos ah beesha caalamka loogu dalbanayo inay soo farageliso xaaladda dalka.

“Shirku wuxuu ugu baaqayaa beesha caalamka inay si degdeg ah u soo farageliso xaaladda cakiran ee siyaasadda federaalka Soomaaliya,” ayaa lagu yiri war-murtiyeedka.

Codsiga Puntland ayaa ku soo beegmaya xilli khilaaf xooggan uu ka dhax taagan yahay dowladda Federaalka Soomaaliya iyo maamul-goboleedyada Puntland iyo Jubaland, gaar ahaan arrimaha wax-ka-beddelka dastuurka iyo hannaanka doorashooyinka dalka.

Puntland ayaa muujisay welwelka ay ka qabto isbeddello lagu sameynayo dastuurka kumeelgaarka ah iyada oo aan loo marin wadatashi loo dhan yahay, iyadoo ku eedeysay Madaxweynaha Soomaaliya, Xasan Sheekh Maxamuud, inuu si sharci-darro ah u wiiqayo nidaamka federaalka.

Bayaanka ayaa sidoo kale lagu sheegay in dowladda federaalka ay ku dadaaleyso inay si keli ah wax uga beddesho dastuurka 2012, taas oo Puntland u aragto xadgudub ka dhan ah nidaamka federaalka. Waxay intaas ku dartay in faragelinta dowladda dhexe ee arrimaha maamul-goboleedyada ay halis ku tahay midnimada iyo xasilloonida dalka.