Soomaaliya iyo Mareykanka oo ka wada hadlay iskaashiga amniga

Soomaaliya, 2 Maarso 2026 (Dawan)– Wasiirka Arrimaha Dibadda Soomaaliya, Cabdisalaam Cali, ayaa maanta oo Isniin ah magaalada Muqdisho kula kulmay sii hayaha Safaaradda Mareykanka, Justin Davis, si ay uga wada hadlaan xoojinta xiriirka amni iyo mid siyaasadeed ee labada dal.

Kulanka ayaa diiradda lagu saaray dardargelinta iskaashiga diblomaasiyadeed iyo isuduwidda dhanka amniga, xilli ay Soomaaliya sii waddo dadaallada lagu xoojinayo xasilloonida iyo dib u dhiska hay’adaha dowladda.

Bayaan ka soo baxay Wasaaradda Arrimaha Dibadda ayaa Mareykanka ku tilmaamay “saaxiib istiraatiiji ah oo aan laga maarmin,” iyadoo lagu caddeeyay doorka muhiimka ah ee kaalmada bini’aadantinimo iyo taageerada amni ee uu Mareykanku ku leeyahay horumarka dalka.

Mareykanka ayaa weli ah deeq-bixiyaha ugu weyn ee Soomaaliya, wuxuuna bixiya tababarrada ciidamada gaarka ah ee Danab, xilli dalku u jihaysan yahay doorashooyinka la qorsheeyay 2026-ka.