Muqdisho, 5 Janaayo 2026 (Dawan)– Mashruuc ay taageerayso hay’adda Qaramada Midoobay u qaabilsan horumarinta (UNDP) ayaa bilaabay inuu wax ka beddelo nolosha bulshooyin ku nool gobollada ay abaartu si ba’an u saameysay ee Soomaaliya, kaddib markii la hirgeliyay ceelal biyo ah oo ku shaqeeya tamarta cadceedda.
Mashruucan, oo ku kacaya ku dhowaad laba milyan oo doollar, kana timid Sanduuqa Sacuudiga ee Horumarinta, ayaa ujeeddadiisu tahay in la yareeyo biyo yarida, isla markaana hoos loo dhigo ku tiirsanaanta biyaha qaaliga ah ee ay bixiyaan ceelalka ganacsiga ee gaarka loo leeyahay.
Laba ka mid ah ceelasha ku shaqeeya cadceedda ayaa toddobaadkii la soo dhaafay lagu wareejiyay bulshooyinka ku nool Awrboogays ee gobolka Sanaag iyo Bacadweyn oo u dhow Gaalkacyo, kuwaas oo muddo dheer wajahayay biyo la’aan daran.
Mashruucan waxaa si wadajir ah u fulinaya UNDP iyo Wasaaradda Tamarta iyo Kheyraadka Biyaha ee Dowladda Federaalka Soomaaliya, waxaana lagu talagalay in uu biyo gaarsiiyo ku dhowaad 120 kun oo qof oo ku nool afar degmo oo miyi ah. Sidoo kale, sagaal ceel oo kale ayaa haatan howlahood la marsiinaaya meel fiican, kuwaas oo qeyb ka ah qorshe ballaaran oo la filayo in ay si dadban uga faa’iideystaan in ka badan saddex milyan oo qof dhammaadka sanadka 2026.
UNDP waxay sheegtay in ku dhowaad kala bar dadka ku nool miyiga Soomaaliya aysan helin biyo nadiif ah , taas oo ku qasabtay qoysas badan inay biyo ka iibsadaan booyado qaali ah, iyada oo halki fusto laga siiyo ilaa $6, taas oo qiime aad uga sarreeya dakhliga maalinlaha ah ee 73% dadka Soomaaliyeed ee ku nool wax ka yar $1.25 maalintii.
