Jabuuti (Dawan)– Aqoon-is-weydaarsi ku saabsan qiimeyntii ugu dambeysay ee Barnaamijka Wasaaradda Caafimaadka Jabuuti ee Qorshaha Qaran ee La-dagaallanka Kaneecada (2020–2026) ayaa Jimcihii ka qabsoomay Sheraton Djibouti.
Kulanka, oo ay soo qaban-qaabisay Wasaaradda Caafimaadka Jabuuti, ayaa socday muddo laba maalmood ah, wuxuuna ahaa dib-u-eegistii ugu dambeysay ee qorshaha qaran. Aqoon-is-weydaarsigu wuxuu muhiim u ahaa tilmaamidda horumarka la gaaray iyo qiimeynta dadaallada lagula dagaallamayo cudurrada kaneecadu gudbiso, isagoo sidoo kale muujiyay baahida loo qabo xoojinta iskaashiga iyo dardargelinta tallaabooyinka lagama maarmaanka u ah ciribtirka kaneecada ee Jamhuuriyadda Jabuuti.
Munaasabadda waxaa ka qaybgalay Xoghayaha Guud ee Wasaaradda Caafimaadka Jabuuti, Maxamed Cali Maxamed, wakiillo ka socday hay’adaha dowladda, iyo daneeyayaal kala duwan.
Xoghayaha Guud ayaa sheegay in kaneecadu weli tahay caqabadda weyn ee caafimaadka dadweynaha Jabuuti, isla markaana aqoon-is-weydaarsigan uu ku soo beegmay xilli muhiim ah oo dalka mar kale u jihaysanayo marxaladda ka hor ciribtirka.
