Dhismaha waddo isku xirta Dhuusamareeb iyo Cadaado oo la billaabay

Dhuusamareeb (Dawan ) – Wasaaradda Howlaha Guud, Dib-u-dhiska iyo Guryeynta ee Soomaaliya iyo Dowlad-goboleedka Galmudug ayaa maanta si wadajir ah u daahfuray dhismaha waddo cusub oo isku xiraysa magaalada Dhuusamareeb, caasimadda Galmudug, iyo deegaanka Qaradhi ee hoostaga magaalada Cadaado ee gobolka Galgaduud, taas oo dhererkeedu gaarayo 60 kiiloomitir.

Mashruucan dhismaha waddooyinka ayaa qeyb ka ah Mashruuca Nagaad, oo ka mid ah mashaariicda waaweyn ee dowladda ee horumarinta kaabayaasha dhaqaalaha, waxaana maalgelinaya Midowga Yurub.

Munaasabadda dhagax-dhigga waddada waxaa ka soo qeyb galay Madaxweynaha Dowladda Galmudug, Axmed Cabdi Kaariye, Wasiirka Howlaha Guud iyo Dib-u-dhiska ee Dowladda Federaalka SoomaaliyaAyubuuIsmaialciil Yuusuf, Safiirka Midowga Yurub ee Soomaaliya, xildhibaanno ka tirsan Baarlamaanka Federaalka Soomaaliya, iyo mas’uuliyiin kale oo ka tirsan labada gole ee Dowladda Galmudug.

Wasiirka Wasaaradda Howlaha Guud, oo ka hadlay munaasabadda dhagax-dhigga waddadan cusub, ayaa sheegay in mashruuca dhismaha waddadan uu qeyb ka yahay hirgelinta mashaariic waddooyin oo gaaraya in ka badan 2,483 km oo ay hadda dowladda gacanta ku hayso, kuwaas oo ka socda qeybo badan oo dalka ah. Isagoo ku daray in mashaariicdan loo qorsheeyay inay si weyn u fududeeyaan dhaqdhaqaaqa bulshada iyo ganacsiga, isla markaana ay ballaariyaan helitaanka adeegyada bulshada.

“Wasaaraddu waxay hadda waddaa hirgelinta mashaariic waddooyin oo gaaraya in ka badan 2,483 km, oo isugu jira daraasad iyo dhisme, kana socda guud ahaan dalka, oo ay ku jirto 60-ka kiiloomitir ee aynu maanta dhagax-dhigeyno,” ayuu yiri wasiirka, isaga oo ku daray, “Waddooyinkan waxaa loo qorsheeyay inay kordhiyaan dhaqdhaqaaqa bulshada, fududeeyaan ganacsiga, ballaariyaan helitaanka adeegyada bulshada, isla markaana xoojiyaan isku-xirnaanta bulshooyinka iyo suuqyada ganacsiga.”

Madaxweynaha dowlad goboleedka Galmudug, ayaa dhankiisa caddeeyay sida ay uga go’an tahay horumarinta kaabayaasha dhaqaalaha, gaar ahaan dhismaha waddooyinka oo laf-dhabar u ah isku socodka bulshada iyo kobaca ganacsiga.

Waxa uu sidoo kale xusay in mashruucan uu door muhiim ah ka ciyaari doono isku-xirnaanta deegaanada Galmudug, fududeynta socodka dadka iyo badeecadaha, iyo sare u qaadista fursadaha horumarineed ee gobolka.

Mashaariicda waddooyinka ee la hirgelinayo waxay ka mid yihiin qorshayaasha waaweyn ee dowladda Soomaaliya ee horumarinta kaabayaasha dhaqaalaha, taas oo qeyb ka ah dadaalka lagu doonayo in lagu hagaajiyo adeegyada muhiimka ah ee bulshada iyo suuqyada ganacsiga.