Trump oo sii wada dacaayadaha ka dhanka ah Soomaalida Minnesota

Washington (Dawan) – Madaxweynaha Mareykanka, Donald Trump, ayaa mar kale hadallo ka dhan ah bulshada Soomaaliyeed ee ku nool gobolka Minnesota ka jeediyay kulnaka wadajirka ah ee Kongareeska Mareykanka, isagoo ku eedeeyay musuqmaasuq isla markaana ku tilmaamay “burcad”.

Intii lagu guda jiray khudbad socotay ku dhowaad laba saacadood oo uu Talaadadii Trump uga hadlayay siyaasadda Mareykanka, ayuu ku dhawaaqay waxa uu ugu yeeray “dagaal ka dhan ah wax isdabamarinta” oo uu hoggaaminayo Madaxweyne ku xigeenka JD Vance.

Wuxuu bulshada Soomaalida ee Minnesota u soo qaatay tusaale, isagoo ku andacooday inay ku lug lahaayeen musuqa lacago gaaraysa 19 bilyan oo doollar oo ka laga soo aruuriyay canshuur-bixiyeyaasha Mareykanka.

“Burcad-badeedda Soomaalida ee ragaadiyay Minnesota waxay na xasuusinayaan inay jiraan meelo badan oo caalamka ka mid ah oo musuqmaasuqa iyo sharcila’aantu ay caadi ka yihiin,” ayuu Trump u sheegay fadhiga wadajirka ah ee Kongareeska, isagoo intaas ku daray in la dagaallanka wax isdabamarinta gobollo ay ka mid yihiin California iyo Maine ay “miisaaniyadda dheelli tiri karto habeen keliya”.

Hadalladan ayaa si degdeg ah u dhaliyay cambaareyn, waxaana si kulul uga falcelisay xildhibaanadda asal ahaan kasoo jeeda Soomaaliya ee Ilhan Omar, oo ku qeylisay inta uu khudbada waday “Beenlow!” iyo “Adigu gacan ku dhiigle ayaad tahay!” xilli ay ku jirtay gudaha Aqalka Wakiillada. Iyadoo ay wehliyaan xildhibaanno kale oo Dimuqraadiyiin ah, waxay sidoo kale tilmaantay in howlgal ay fuliyeen ciidamada federaalka oo dhawaan ka dhacay Minneapolis in lagu dilay laba muwaadin oo Mareykan ah.

Inkastoo qaar ka mid ah Soomaalida Mareykanka hore loogu xukumay kiisaska wax isdabamarinta la xiriira lacagihii gargaarka xilligii cudurkii safmarka ahaa ee COVID, hadana dacwad-oogayaasha federaalka iyo saraakiisha gobolka ayaa shaki geliyay tirada 19-ka bilyan ee Trump sheegay, iyagoo xusay in qaddarka la xaqiijiyay uu aad uga yar yahay intaasi.