Galmudug.. SODMA oo 100 booyadood oo biyo ah gaarsiisay Af-Barwaaqo

Soomaaliya, 3 Maarso 2026 (Dawan)– Hay’adda Maareynta Musiibooyinka Qaranka Soomaaliyeed (SODMA) ayaa maanta oo Talaado ah 100 booyadood oo biyo ah gaarsiisay degmada Af-Barwaaqo ee gobolka Mudug, si wax looga qabto biyo la’aanta ka jirta deegaanka.

Gargaarkan, oo uu hoggaaminayay Guddoomiyaha SoDMA, Maxamuud Macallin Cabdulle, ayaa qayb ka ah hawlgal biyo-dhaamis degdeg ah oo maalmahan ka socday deegaannada Dowlad-Goboleedka Galmudug.

Ujeeddada hawlgalkan ayaa ah in lagu taageero bulshooyinka xoolo-dhaqatada ah, kaddib markii roobab is-daba-joog ah oo fashilmay ay qalajiyeen ilihii biyaha dabiiciga ahaa, isla markaana saameyn ku yeesheen xoolaha.

Intii uu hawlgalku socday, Guddoomiyuhu waxa uu carrabka ku adkeeyey baahida loo qabo in dadaallada gargaarka lala jaanqaado baahiyaha degdegga ah ee guddiyada abaaraha ee deegaanka, isagoo muujiyey sida ay uga go’an tahay hay’addu taageeridda qoysaska wajahaya xaalado nololeed oo adag.

Mas’uuliyiinta Af-Barwaaqo ayaa sheegay in abaaro ba’an oo ay sii xoojiyeen isbeddelka cimilada iyo kaabayaasha waddooyinka oo liita ay caqabad ku noqdeen gaarsiinta gargaarka deegaannada miyiga ah ee fogfog.

Dowladda Federaalka Soomaaliya ayaa maalmahan waday hawlgallo biyo-dhaamis degdeg ah oo ay ka fulinayso deegaannada Galmudug, si loo yareeyo saameynta abaaraha.