Duqa Caasimadda Hargeysa, C/kariim Axmed Mooge, ayaa jawaab ka bixiyay eedeymo iyo codsi kaga yimid xubno ka tirsan Golaha Deegaanka Hargeysa, kuwaas oo ay ku dalbadeen in la qabto kalfadhi aan caadi ahayn. Qoraal labo qaybood ka kooban oo kasoo baxay xafiiskiisa ayaa lagu sheegay in dalabkaasi aanu waafaqsanayn sharciga iyo xeerka Golaha Deegaanka, islamarkaana eedaha loo jeediyay duqa ay yihiin kuwo aan sal iyo raad toona laheyn.
Qoraalka ayaa xusay in kalfadhigii caadiga ahaa ee golaha uu hakad galay sababo la xiriira doorashooyinka, balse aanay jirin eedayn sharci ku dhisan oo ka dhalan karta arrintaas. Duqa ayaa sidoo kale si adag u diiday eedaha sheegaya in uu ku xadgudbay qodobo sharci ah, isagoo ku adkaystay in uu si buuxda u fulinayo waajibaadkiisa dastuuriga ah.
Sidoo kale, duqa ayaa tilmaamay in qoraalka xubnaha golaha ay soo gudbiyeen aanu lahayn saxeex sharciyeed buuxa taasoo keentay in loo arko mid aan sharci ahayn. Isla markaana xubnaha qaar ee ku saxiixan aysan qeyb ka aheyn eedeedaha loo soo jeediyay.
Ugu dambayn, C/kariim Axmed Mooge wuxuu khilaafkaas u gudbiyay Guddiga Joogtada ah iyo Wasaaradda Arrimaha Gudaha si ay u qiimeeyaan eedaha iyo jawaabta uu bixiyay.