Gacmaha ma laaban doonno... Fiqi oo digniin u diray Israa'iil

Muqdisho (Dawan) — Wasiirka Gaashaandhiga Soomaaliya, Axmed Macalin Fiqi, ayaa si cad u sheegay in Soomaaliya aysan gacmaha ka laaban doonin haddii Israa’iil ay isku daydo inay timaado dhulka Soomaaliyeed, isagoo tilmaamay in dhammaan tallaabooyinka suurtagalka ah loo qaadi doono si loo difaaco madaxbanaanida iyo midnimada dalka.

Wasiir Fiqi, oo wareysi siiyay Telefishinka Al-Jazeera qeybtiisa Carabiga, ayaa cuksaday in xeerarka caalamiga ah iyo sharciga Soomaaliya ay xaq u siinayaan dowladda in ay difaacdo xuduudaha iyo madaxbanaanida qaranka. “Soomaaliya waa lagu xadgudbay. Haddii Israa’iil ay isku daydo inay cagaheeda soo dhigto qayb ka mid ah dhulkeena, waxaan qaadi doonnaa dhammaan tallaabooyinka suurtagalka ah, mana noqon doonno kuwo gacmaha laabta,” ayuu yiri wasiir Fiqi.

Wasiirka ayaa sidoo kale caddeeyay in Soomaaliya aysan marnaba oggolaan doonin in la kala qaybiyo, xitaa haddii dowlad awood leh ay isku daydo arrintan. “Ma oggolaan doonno, mana aqbali doonno in Soomaaliya la kala qaybiyo, si kasta oo ay u weyn tahay ama u awood badan tahay dowladda isku dayaysa arrintaas,” ayuu ku daray hadalkiisa.

Hadalkaan ayaa ku soo aaday xilli xiisado cusub ka taagan yihiin Geeska Afrika, ka dib markii Ra’iisul Wasaare Natenyahu ee Israa’iil uu u aqoonsaday Somaliland sidii dal madax banaan, go’aankaas oo cambaareeyn kala kulmay inta badan dowladaha caalamka iyo ururrada caalamiga ah.