Muqdisho (Dawan) – Golaha Mustaqbalka Soomaaliyeed ayaa si adag u diiday waxa uu ku tilmaamay habkii lagu ansixiyay wax-ka-beddelka iyo dhammaystirka Dastuurka Jamhuuriyadda Federaalka Soomaaliya, isaga oo sheegay in hannaankaas uu jebiyay habraacyada dastuuriga ah iyo xeer-hoosaadyada Baarlamaanka.
War-saxaafadeed uu goluhu soo saaray maanta ayaa lagu sheegay in wax-ka-beddelka dastuurka lagu fuliyay hab aan buuxin shuruudaha aqlabiyadda laba-meelood laba (2/3) ee labada aqal ee Baarlamaanka Federaalka Soomaaliya, isla markaana aan la tixgelin habraacyada sharci ee lagu maamulo arrimaha dastuuriga ah.
Golaha Mustaqbalka Soomaaliyeed ayaa ku dooday in dastuurku yahay heshiis bulsho oo aasaas u ah dowladnimada iyo wadajirka ummadda, islamarkaana aan lagu beddeli karin rabitaan siyaasadeed oo koox gaar ah. Golaha ayaa sidoo kale sheegay in wax-ka-beddel kasta oo dastuurka lagu sameeyo ay tahay in lagu maro hab sharci oo cad, heshiis siyaasadeed oo loo dhan yahay iyo wadatashi dadweyne oo macno leh.
War-saxaafadeedka ayaa sidoo kale lagu xusay in hannaanka lagu ansixiyay wax-ka-beddelka dastuurka ay hareeyeen eedeymo la xiriira cadaadis siyaasadeed, caburin iyo cod-iibsasho, kuwaas oo ay sheegeen inay dhaawacayaan kalsoonida lagu qabi karo hay’adda sharci-dejinta. Golaha ayaa intaas ku daray in in ka badan 50 xildhibaan laga hor istaagay ka qeybgalka doodaha Baarlamaanka ee arrintan la xiriira.
