Muqdisho, Hoobiyayaal ayaa lagu tuuray agagaarka Garoonka Diyaaradaha Muqdisho iyo saldhigga Hawlgalka Taageerada iyo Xasilloonida Midowga Afrika ee AUSSOM ee Xalane subaxnimadii hore ee maanta. Weerarku wuxuu dhacay aroornimadii saakay, qiyaastii 6:00 subaxnimo, iyadoo dhowr hoobiya lagu dhuftay goobaha ku dhow Safaaradda Talyaaniga.
Warbixinnada hore ayaa sheegaya in aysan jirin wax khasaare ama dhaawac ah iyo sidoo kale hanti waxyeello soo gaartay, sida lagu sheegay war saxaafadeed ka soo baxay AUSOM. Si kastaba, weerarkan ayaa sababay in shirkadaha diyaaradaha caalamiga ah ee Turkish Airlines iyo Egypt Air ay joojiyaan duulimaadyadoodii Muqdisho. Waxaa la rumeysan yahay in joojinta duulimaadyada ay xiriir la leedahay weerarka hoobiyayaasha ee saakay ka dhacay caasimadda.
Sidoo kale, shalay ayaa ahayd markii ugu dambeysay ee weerar hoobiyayaal ah lagu qaaday meel aan ka fogeyn Madaxtooyada Soomaaliya, halkaas oo ugu yaraan lix qof ay ku dhaawacmeen.
Illaa iyo hadda, ma jirto cid sheegatay mas'uuliyadda weerarradan hoobiyayaasha ah, kuwaas oo lagu beegsanayo goobaha muhiimka ah ee Muqdisho sida Madaxtooyada, Xalane, iyo Safaaradda Talyaaniga.