Muqdisho, Soomaaliya – In ka badan 110,000 oo qof ayaa lagu qasbay inay ka barakacaan guryahooda, kaddib dagaallo ka dhacay deegaanno ka tirsan Puntland iyo gobollada Shabeellaha Dhexe iyo Shabeellaha Hoose, sida ay sheegtay Xafiiska Qaramada Midoobay ee Isu-dubbarridka Gargaarka Bani’aadannimo (OCHA).
OCHA ayaa intaas ku dartay in dagaal beeleedyo is-daba joog ah oo ka socda meelo kala duwan ay sababeen in kumannaan qof oo dheeraad ah ay barakacaan bilooyinkii la soo dhaafay. Dhanka kale, abaaro daba-dheer iyo roobab yaraaday ayaa sii xoojiyay barakaca.
Khatartaasi waxa ay kusoo beegmaysaa iyadoo Soomaaliya ay la daalaa-dhacayso cunno yari sii kordheysa. Warbixin cusub oo ay soo saartay Hay’adda Qiimaynta Ammaanka Cuntada (IPC) ayaa saadaalisay in ku dhowaad 4.6 milyan oo qof ay wajahayaan heerar sare oo macaluul ah inta u dhaxeysa hadda iyo bisha Juun 2025. Sidoo kale, 1.8 milyan oo caruur ah oo ka yar da’da 5 sano ayaa la filayaa inay la kulmaan nafaqo-darro ba’an, waxaana ku jira ku dhowaad 480,000 oo halis ugu jira nafaqo-darro daran.
OCHA waxay ka digtay in baahiyaha bini’aadantinimo ee Soomaaliya ay sii kordhayaan xilli ay hoos u dhacday taageerada dhaqaale ee gargaarka. Baaqii gargaarka 2025 oo lagu dalbanayay $1.42 bilyan ayaa ilaa hadda la helay 9% oo kaliya, oo ah $131 milyan.