Itoobiya, 10 Janaayo 2026 (Dawan)— Dowladda Itoobiya ayaa si rasmi ah u bilowday dhismaha garoon diyaaradeed oo lagu tilmaamay kan ugu weyn qaaradda Afrika, kaas oo yeelan doona awood uu ku qaado ilaa 110 milyan oo rakaab ah sannadkii marka uu dhammaado,taa oo ah arrin si weyn u beddeli karta khariidadda duulista Afrika.
Munaasabadda dhagax-dhigga mashruuca Garoonka Caalamiga ah ee Bishoftu ayaa waxaa ka qeyb galay Ra’iisul Wasaaraha Itoobiya Abiy Ahmed, iyo mas’uuliyiin sare oo ka tirsan dowladda, iyadoo mashruuca loo arko tallaabo istiraatiiji ah oo lagu xoojinayo doorka Itoobiya ee duulista caalamiga ah.
Ra’iisul Wasaare Abiy Ahmed ayaa sheegay in garoonkan uu yahay astaan muujinaysa hiigsiga Itoobiya ee horumar iyo casriyeyn, isagoo xusay in Shirkadda Diyaaradaha Ethiopian Airlines ay laf-dhabar u tahay horumarka duulista dalka iyo sumcadda caalamiga ah ee Itoobiya. Wuxuu tilmaamay in guusha shirkaddu ay ku dhisan tahay badbaado, hufnaan shaqo, iyo hoggaan leh aragti fog.
