Jabuuti, 25 Febraayo 2026 (Dawan)– Booliska Qaranka Jabuuti ayaa gacanta ku dhigay shabakad dambiilayaal ah oo ku takhasustay dhaca iyo baadda dadwaynaha, gaar ahaan lammaanaha, kaddib weerarro hubeysan oo isdaba joog ah oo ka dhacay duleedka caasimadda, sida ay mas’uuliyiintu sheegeen Talaadadii.
Kooxdan, oo lagu daba joogay tan iyo bilowgii 2026, waxay beegsan jirtay dad ku sugan xaafado dhowr ah oo caasimadda ka tirsan, sida Agadhereh, Chebeley, Nagad, Tora Bora iyo Barwaqo 2, iyo sidoo kale aagagga ku hareeraysan Jaamacadda Balbala.
Baarayaasha booliska ayaa sheegay in kooxdu adeegsan jirtay xeelad “dabin” ah oo qorsheysan, iyagoo ka faa’iideysanayay qof dumar ah si ay ugu soo jiitaan lammaanaha wata baabuurta ama mootooyinka ee jooga goobaha go’doonsan. Eedeysanayaasha ayaa adeegsan jiray mindiyo iyo baangado si ay u dhacaan lacagta caddaanka ah iyo taleefannada gacanta, iyagoo mararka qaar wax yeello geysan jiray haddii dhibbanayaashu iska caabiyaan.
Booliska Degmada 4-aad ayaa xaqiijiyay xarigga hoggaamiyihii kooxda iyo saddex ka mid ah xubnaha muhiimka ah, oo ay ku jirto haweeney. Afarta qof ayaa si rasmi ah waxaa u aqoonsaday qaar ka mid ah dhibbanayaashii loo geystay falalka dhaca ah.
