Madaxweynaha Israa’iil oo booqasho ku tegay Itoobiya

Addis Ababa (Dawan ) – Madaxweynaha Israa'iil, Isaac Herzog, ayaa subaxnimadii maanta oo Arboco ah booqasho rasmi ah ku tegay magaalada Addis Ababa, si loo xoojiyo xiriirka diblomaasiyadeed ee labada dal.

Madaxweynaha Israa’iil waxaa garoonka diyaaradaha caalamiga ah ee Bole International Airport ku soo dhaweeyay Wasiirka Arrimaha Dibadda ee Itoobiya, Gedion Timothewos, iyo Wasiir-ku-xigeenka Arrimaha Dibadda, Berhanu Tsegaye.

Warbaahinta Itoobiya ayaa booqashadan ku tilmaamtay mid muhiim ah, iyadoo lagu xoojinayo iskaashiga labada dal ee dhinacyada siyaasadda, dhaqaalaha, iyo hal-abuurnimada.

Inta uu ku sugan yahay Itoobiya, Madaxweynaha Israa’iil waxaa lagu wadaa inuu la kulmo madax sare iyo mas’uuliyiin ka tirsan dowladda Itoobiya, iyadoo kulamadan diiradda lagu saari doono xoojinta xiriirka labada dal, gaar ahaan dhinacyada ganacsiga, hal-abuurnimada, iyo iskaashiga amniga.

Iskaashiga Israa'iil iyo Itoobiya ayaa si weyn u sii xoogeysanaya, iyadoo labada dal ay ka shaqeynayaan sidii ay u gaari lahaayeen iskaashi laba-geesood ah oo waara.

Booqashadan Madaxweynaha Israa’iil ee Itoobiya ayaa muujinaysa muhiimadda weyn ee iskaashiga labada dal.