Jabuuti (Dawan)– Dowladda Jabuuti ayaa dardargelinaysa qorshe istiraatiiji ah oo ay ku horumarinayso warshadaha iyo wax-soo-saarka gudaha, kaddib wada-hadallo ay la yeelatay shirkado dowladeed oo ka socda Shiinaha, kuwaas oo diiradda saaraya tamarta laga cusboonaysiin karo iyo dhisidda warshado cusub, sida ay Isniintii sheegtay wakaaladda wararka ee qaranka.
Madaxweynaha Jabuuti Ismaaciil Cumar Geelle ayaa Qasriga Jamhuuriyadda kula kulmay wafdi ka socda Shiinaha, halkaas oo lagu gorfeyay mashaariic ku saabsan tamarta laga dhaliyo qorraxda iyo dabaysha, kuwaas oo lagu yareynayo ku tiirsanaanta dalka ee tamarta dibadda laga soo dhoofiyo, isla markaana lagu heli doono tamar jaban oo lagu taageero warshadaha soo koraya.
Mas’uuliyiinta ayaa sheegay in mashaariicdan ay qayb ka yihiin istiraatiijiyadda ballaaran ee dowladda Jabuuti ku doonayso inay ku xoojiso awoodeeda dhanka warshadaha, korna ugu qaaddo wax-soo-saarka gudaha iyo shaqo-abuurka, xilli ay dalkaasi uu wajahayo baahi sii kordheysa oo dhanka tamarta ah.
Iskaashigan ayaa sidoo kale la filayaa inuu ku fido qaybaha warshadaha , gaar ahaan kuwa ku saleysan macdanta milixda, iyadoo qorshuhu yahay in la dhiso xarumo soo saara dawooyin, kiimikooyin, iyo warshado lagu farsameeyo wax-soo-saarka beeraha iyo cuntada. Dowladda Jabuuti ayaa hiigsanaysa in ay kordhiso qiimaha gudaha ee khayraadkeeda dabiiciga ah, halkii ay ku ekaan lahayd dhoofinta alaabta ceeriin.
