Jigjiga oo laga daahfuray wejiga 2-aad ee Horumarinta Nafaqada

Jigjiga (Dawan) – Magaalada Jigjiga ayaa shalay si rasmi ah looga daahfuray wejiga labaad ee Mashruuca Horumarinta Nafaqada iyo Amniga Cuntada, kaasoo loogu talagalay in lagu xoojiyo nidaamka cuntada iyo nafaqada ee Dowlad Deegaanka Soomaalida.

Mashruucan ayaa muhiim u ah horumarinta caafimaadka bulshada iyo kor u qaadida heerarka nafaqada ee dadka ku nool deegaanka.

Wasiir ku xigeenka Xafiiska Beeraha ee Dowlad Deegaanka Soomaalida, Cabdiraxmaan Nuur, oo ka hadlay munaasabadda, ayaa sheegay in mashruucan uu yahay mid cusub oo wax ka beddeli doona hab nololeedka bulshada, iyadoo si gaar ah loogu dadaalayo hagaajinta qaab-dhismeedka nidaamka cunnada iyo ka faa’iidaysiga wax-soo-saarka khudaarta ee deegaanka.

“Mashruuca Horumarinta Nafaqada iyo Amniga Cuntada wuxuu bulshada siinayaa bedel weyn, isagoo si gaar ah u xoojinaya ka faa’iidaysiga wax-soo-saarka khudaarta iyo hagaajinta isticmaalka cunnada,” ayuu yiri Wasiir ku xigeenka.

Mashruuca ayaa lagu horumarin doonaa qeybaha kala duwan ee beeraha, iyadoo la xoojin doono kaabayaasha, tababarka, iyo wacyigelinta bulshada si looga faa’iideysto fursadaha cusub ee wax-soo-saarka nafaqo leh. Waxaa sidoo kale la filayaa in la xoojiyo iskaashiga hay’adaha dowladda iyo kuwa gaarka ah si loo gaaro hadafyada mashruuca.

Wejiga labaad ee mashruuca ayaa xoogga saaraya yareynta nafaqadarrada, gaar ahaan carruurta iyo hooyooyinka, iyadoo la fulin doono barnaamijyo gaar ah oo lagu horumarinayo caafimaadka bulshada iyo ka hortagga cudurrada ka dhasha nafaqo-xumida.

"Sanadkii hore waxaa jiray guulo la taaban karo oo laga gaaray mashruuca, waxaana bulshada si weyn uga muuqda isbeddellada ku yimid isticmaalka cuntada iyo wax-soo-saarka. Waxaan rajeynaynaa in wejiga labaad uu sii xoojiyo dadaalladaas," ayuu yiri Mudane Cabdiraxmaan Nuur.

Mashruucan oo socon doona muddo saddex sano ah ayaa waxaa iska kaashanaya dowladda deegaanka, hay’adaha caalamiga ah, iyo ururrada bulshada rayidka ah.