Heerka sicir-bararka Soomaaliya oo kor u kacay sanadkii 2025

Soomaaliya (Dawan)— Heerka sicir-bararka sannadlaha ah ee Soomaaliya ayaa kor u kacay 5.1% bishii Diseembar 2025, waxaana kororkaas horseeday qiimaha adeegyada iyo cuntada, sida uu Arbacadii shaaciyay Xafiiska Qaranka ee Tirakoobka Soomaaliya (SNBS).

Kororka sannadlaha ah ayaa ka tarjumaya sare u kac dhanka qiimaha marka loo eego celceliska sannadlaha ah ee 2024 oo ahaa 3.7%. Marka la eego heerka bishii Diseembar, Tusmada Qiimaha Macmiilka (CPI) waxay kordhay 0.7%. CPI waa cabbirka ugu muhiimsan ee sicir-bararka dalka, waxaana loo adeegsadaa in lagu haggo siyaasadda lacagta iyo maaliyadda si loo ilaaliyo xasilloonida dhaqaalaha.

Xafiiska ayaa sheegay in kororka ugu weyn ee qiimaha sannadlaha ah laga dareemay adeegyada maqaayadaha iyo hoyga oo kordhay 14.1%, waxaana ku xigay daryeelka shakhsiga ah iyo adeegyada bulshada oo kor u kacay 11.0%.

Adeegyada caafimaadka iyo waxbarashada ayaa iyaguna kordhay 10.6% iyo 8.6% siday u kala horreeyaan, halka cuntada iyo cabitaannada oo muhiim u ah nolosha qoyska Soomaaliyeed ay korodhay 6.6%.

Qayb ahaan, hoos u dhac ayaa lagu arkay gaadiidka oo hoos u dhacay 3.9%, iyo qiimaha qaar ka mid ah badeecadaha oo hoos u dhacay 2.5%.

Xogta gobollada ayaa muujisay kala duwanaansho ballaaran. Dawlad-goboleedka Koonfur-Galbeed ayaa laga diiwaangeliyay sicir-bararka sannadlaha ah ee ugu sarreeyay oo gaaray 8.0%, halka Puntland ay gaartay hoos u dhac 1.3%, taas oo inta badan ka dhalatay hoos u dhac ku yimid qiimaha cuntada.

Xafiiska ayaa xusay in hoos u dhaca Puntland uu qayb ka yahay sababaha hoos u dhigista guud ee tusmada dalka marka loo eego miisaanka xogta.

Xafiiska ayaa sidoo kale sheegay in tirooyinkii ugu dambeeyay lagu ururiyay hanaan casri ah, oo ay ku jiraan miisaannadii la cusbooneysiiyay 2022 iyo kala-soocidda isticmaalka shakhsiga ah ee 2018 (COICOP), iyadoo xog laga soo ururiyay 537 shay oo ka kala yimid dhammaan Dowlad-goboleedyada xubnaha ka ah Dowladda Federaalka Soomaaliya.