Cammaan (Dawan)- Khudbadda Maxamed Barre Maxamuud, Wasiirka Wasaaradda Dhallinyarada iyo Ciyaaraha Jamhuuriyadda Federaalka Soomaaliya
Kulanka Qorshaha Fulinta Istaraatiijiyadeed ee Carabta ee Dhallinyarada, Nabadda iyo Amniga (2023-2028) ee dalalka xubnaha ka ah Ururka Jaamacadda Carabta .
Cammaan - Boqortooyada Jordan 28/29 August 2024
Mudanayaasha sharafta iyo qiimaha mudan, Wasiirada Dhallinyarada iyo Ciyaaraha Carabta
Danjire Dr. Haifa Abu Ghazaleh - Kaaliyaha Xoghayaha Guud ahna Madaxa Waaxda Arrimaha Bulshada ee Ururka Jaamacadda Carabta
Mudane Dr. Ashraf Sobhi – Wasiirka Dhallinyarada iyo Ciyaaraha Jamhuuriyadda Carabta ee Masar, ahna Madaxa Xafiiska fulinta ee Golaha Wasiirrada Dhallinyarada iyo Ciyaaraha Carabta
Mudane Maxamed Salama Al-Nabulsi – Wasiirka Dhallinyarada ee Boqortooyada Jordan, ku-xigeenka Xafiiska Fulinta Golaha Wasiirrada Carabta ee Dhallinyarada iyo Ciyaaraha ahna Guddoomiyaha Kalfadhigaan (47) ee Golaha
Wasiirada, Safiirada iyo mudanayaasha sharafta leh ee goob joogga ah,
Asalaamu calaykum waraxmatulaahi wabarakaatuh.
Waxaan ku faraxsanahay inaan maanta ka qayb qaato furitaanka iyo billaabidda Istaraatiijiyadda Carbeed ee Dhallinyarada, Nabadda iyo Amniga (2023 -2028) ee qayb ka ah howlaha Madasha Caalamiga ah ee Dhallinyarada, Nabadda iyo Amniga.
Mudanayaasha sharafta iyo qaddarinta mudan, waxaa farxad ah ii ah inaan uga mahadceliyo Boqortooyada Jordan sida wanaagsan ee ay u qaban qaabiyeen howlaha munaasabadaan iyo dadaalka joogtada ah ee ay ku bixinayaan sidii looga mira dhalin lahaa istiraatijiyadda Carabta ee dhallinyarada, nabadda iyo amniga, waxaana u rajeynayaa guul iyo barwaaqo.
Waxaan sidoo kale si kal iyo laab ah uga mahadcelinaya soo dhawayntii wanaagsanayd ee aan la kulanay tan iyo markii aan soo gaarnay dalkan
Mudanayaasha sharafta iyo qaddarinta mudan
Istaraatiijiyadda Carbeed ee Dhallinyarada, Nabadda iyo Ammaanka waxay ka dhigan tahay aragti wadajir ah oo Carbeed oo ka amba qaadeysa Qaraarka Qaramada Midoobay ee 2250 “ Dhallinyarada, Nabadda iyo Ammaanka” , kaas oo macnahiisu yahay in kor loo qaado ka-qaybgalka dhallinyarada ee nabadda iyo amniga caalamiga ah
Marka la eego xaaladda gobolka, Istaraatiijiyaddan waxay noqoneysa tii ugu horeysay ee nuuceeda ah taas oo ka dhigan aqoonsiga Carabta ee taageerada nabadda iyo amniga gobolka iyo fulinta ajendaha nabadda iyo amniga, kor u qaadista iyo xoojinta kaalinta dhallinyarada ee go'aan qaadashada dhammaan arrimaha siyaasadda , bulshada iyo ka hortagga khilaafaadka iyo xallintiisa.
Mudanayaasha sharafta iyo qaddarinta mudan
Dhallinyarada , Nabadda iyo Amnigu meelna kuma kala haraan. Arrintaas waxaa tusaale cad u ah Soomaaliya iyo sida ay dhallinyaradu kaalin ugu leeyihin amniga iyo nabadda. Marki hore waxay hormuud ka ahaayeen colaadihii iyo dagaalladii dhiigga badan ku daatay ee dalka, maantana Alle mahadiis kaddib dadaal ay bixisay dowladda federaalka Soomaaliya, waxay qayb muhiim ah ka yihiin ka shaqaynta nabadda iyo amniga. Wasaaradda Dhallinyarada iyo Ciyaaraha waxay xil iska saartay maalgelinta dhallinrada iyo in la ballaariyo sidii ay uga qayb qaadan lahaayeen nabadda iyo amniga dalka
Mudanayaasha sharafta mudan
Waxaa lagu qiyaasaa in dhallinyaradu ay yihiin in ka badan 75% bulshada Soomaaliyeed, sidaas darteedna ay qayb wax ku ool ah ka qaataan hannaanka dowlad dhisidda iyo nabadaynta dalka
Siyaasadda Qaran ee Dhallinyarada Soomaaliyeed oo la ansixiyay May 2023, Waa tiirkii afraad ee siyaasadda Qaran ee Dhallinyarada Soomaaliyeed iyo dejinta istiraatijiyadda iyo qorshe hawleedka qaran ee dhallinyarada, nabadda iyo amniga Soomaaliya.
Mudanayaasha sharafta mudan
Ii ogolaada inaan idin la wadaago mudnaanta barnaamijka ay wasaaradeenu ka leedahay dhallinyarada, anagoo xisaabta ku darsanayna in dhalinyaradu ay laf dhabar u tahay qaranimada Soomaaliyeed sidoo kalena ay tahay awoodda iyo waddada loo marayo horumarka maadaama ay yihiin inta badan bulshada, waxaana muujineynaa sida aan u xoogga u saareyno dhallinyarada iyo inaan kor u qaadno ka qayb qaadashadooda go'aanada iyo inay si firrfircooon uga qayb qaataadan howlaha dowladda.
Si aan ugu bedelno dadaalkeena la xiriira Istaraatiijiyadda Dhallinyarada, Nabadda iyo Amniga natiijooyin la fulin karo, Wasaaradda Dhallinyarada iyo Ciyaaraha waxay guda gashay hawsha muhiimka ah ee diyaarinta Qorshe Hawleed Qaran oo gaar ah kuna saabsan Dhallinyarada, Nabadda iyo Amniga.
Qorshahan waxa uu u adeegi doonaa istaraatiijiyadda lagu hagayo dadaalladeena lagu xoojinayo dhalinyarada si ay uga qayb qaataan nabad-dhisidda, xallinta khilaafaadka iyo wadajirka bulshada.
Waxaan ku faraxsanahay inaan idinla socodsiiyo in geeddi-socodka samaynta Qorshe hawleedka Qaranka uu hadda socdo.
Ugu dambayntii, waxaan mahadnaq iyo bogaadin u soo jeedinayaa Boqortooyada dalka Jordan , Jaamacadda Carabta, iyo khubaradii gacanta ka geysatay diyaarinta Istiraatiijiyadda Carabta ee Dhallinyarada, Nabadda iyo Amniga. Waxaan sidoo kale uga mahadcelinaya wasiiradda dhallinyarada iyo ciyaaraha dadaalkooda muuqda ee ay ugu adeegayaan dhallinyarada dalalkeena Carabta. Ilaahay dhamaanteen hana waafajiyo wixii khayr u ah dhallinyaradeena.
Asalaamu calaykum waraxmatulaahi wabarakaatuh.