Muqdisho, 11 Janaayo 2026 (Dawan) — Kumannaan haween ah ayaa maanta oo Axad ah isugu soo baxay bartamaha caasimadda Muqdisho, iyagoo si adag uga dhiidhiyay aqoonsigii dhowaan Israa’iil ay siisay Somaliland, go'aankaas oo ay ku tilmaameen xadgudub ka dhan ah madax-bannaanida iyo midnimada dhuleed ee Jamhuuriyadda Federaalka Soomaaliya.
Dibadbaxa, oo ka dhacay fagaaraha taallada Daljirka Dahsoon, ayaa sababay in la xiro waddooyin muhiim ah oo gala bartamaha magaalada, iyadoo mudaaharaadku qaatay dhowr saacadood . Haweenka dibadbaxayay, oo isugu jiray hooyooyin, arday iyo dhalinyaro , ayaa watay boorar ay ku qornaayeen hal-ku-dhigyo muujinaya midnimada qaranka, isla markaana cambaareynaya waxa ay ku sifeeyeen faragelin shisheeye.
Isu-soo-baxa waxaa soo qabanqaabiyay Ururka Haweenka Gobolka Banaadir, kaas oo sheegay in ujeeddada dibadbaxu tahay in la muujiyo doorka iyo codka haweenka Soomaaliyeed ee ku aaddan difaaca midnimada dalka. Guddoomiyaha ururka, Jawaahir Baarqab, ayaa warbaahinta u sheegtay in aqoonsiga Israa’iil ee Somaliland uu khatar ku yahay xasilloonida gobolka, isla markaana uu horseedi karo xiisado hor leh oo ka curtay Geeska Afrika.
“Haweenka Soomaaliyeed ma aqbalayaan in lagu xadgudbo dhulkooda iyo badahooda. Waxaan maanta halkan u joognaa inaan muujinno in midnimada Soomaaliya aysan ahayn arrin laga gorgortami karo,” ayay tiri Jawaahir Baarqab.
