Madaxweynaha Somaliland, Cabdiraxmaan Maxamed Cabdillaahi (Cirro), ayaa maanta magacaabay Guddiga Qaran ee Agaasinka iyo Qabanqaabada Xuska 18-ka May 2025. Oo ku beegan maalin ay Soomaaliland ku dhawaaqday in ay ka go’day Soomaaliya.
Wareegtada Madaxweynaha ayaa lagu xustay muhiimadda maalinta 18-ka May u leedahay shacabka Somaliland, iyadoo la tixraacay doorka ay leedahay xoojinta midnimada iyo sumcadda caalamiga ah ee Somaliland.
Madaxweynaha ayaa sidoo kale tilmaamay in sannadkan uu yahay kii ugu horreeyay ee Xukuumadda Wadajir iyo Waxqabad xilka haysato, sidaas darteedna loo baahan yahay in xuska sannadkan si heer qaran ah loo abaabulo.
Guddigan ayaa waxaa hoggaamin doona Wasiirka Arrimaha Gudaha iyo Amniga, halka Wasiirka Warfaafinta uu noqon doono guddoomiye ku-xigeen, Wasiirka Madaxtooyaduna uu noqon doono xoghaye. Guddigu waxa uu ka koobanyahay sagaal xubnood oo isugu jira wasiiro, guddoomiyaha gobolka Maroodijeex, iyo duqa caasimadda Hargeysa.
Madaxweynaha ayaa faray dhammaan hay’adaha dawladda, maamullada gobollada iyo degmooyinka inay si buuxda ula shaqeeyaan guddigan si loo qabto munaasabad heer sare ah.
18-ka May waa maalinta ay Somaliland ku dhawaaqday gooni-isku-taaggeeda, taasoo dhacday 18-kii May 1991. Maalintan ayaa si weyn looga xusaa deegaanadda Soomaaliland. Balse Sanadkaan uma muuqato in laga xusi doono deegaanadda SSC-khaatumo.